呢個世界，有守唔到寡嘅姣婆，亦都有話嫁又唔嫁嘅怨婦，退出咗白鴿黨（民主黨）嘅南區區議員區諾軒，究竟係屬於邊種，相信唔使畫公仔畫出腸啦啩？本來諗住落九龍西玩下年3月立法會補選嘅吽A前晚又話「終極」唔玩嘞，仲搬埋老婆出嚟做擋箭牌，真係男人中嘅XO！不過啲花生友就覺得係佢嘅叫座力同質素問題，講話去選講咗咁耐都無乜回響，索性搵個原因自己摺埋一二邊罷就！
查實區諾軒對於「to run or not to run」呢個問題都扭扭擰擰開㗎啦，一時放風話選，一時又話唔制，之後俾網台「D100」老闆鄭大班（鄭經翰）衝入直播室質兩句揸吓手又話選，到前晚終於作出佢口中嘅「終極決定」嘞。佢前晚打上去大口玲（李慧玲）個節目，同啲自己友耍冧話唔選嘞，因為得唔到老婆支持，好有阻力咁話，俾大口玲全程質佢點解唔早響，喺度反反覆覆。
佢噚日又接受網媒訪問，話如果去馬，除咗屋企之外，南區嘅地區工作亦都會付出好大代價，又認衰話自己可以處理得更好。佢自己唔玩啫，都唔代表佢會覺得仲肯堅持去馬嘅人係好嘢，轉個頭佢就對其餘潛在參選人指指點點嘞，其中佢插民協「facebook管理員」馮檢基插得最應，鬧對方打壓黨內後生仔，又爆料話民協3個後生區佬楊彧、江貴生同何啟明，即使有地區議題可以發大嚟搞，都無搵馮檢基幫手。
至於前黨友、深水埗區議員美容袁（袁海文），區諾軒就叫對方多啲接觸其他政團，唔使等個黨開會決定先落場，又話前公民黨成員曾健超雖然社運交情多，但大黨係咪支持佢就有保留喎。
網民批「唔知條友想點」
由去到唔去、再到去、最終又唔去，唔少花生友質疑佢係咪住喺「搖擺賓州」。「John O'Brien」直言「唔知條友想點」，最憎佢零表達能力同埋極度優柔寡斷，「Bilo Yung」就叫佢唔使口水多過茶，「直接啲講，後排變第一排？淆底囉！」「HK UM」就唔滿意佢平時吹水吹到縱觀全局咁樣，同社民連廢陶（陶君行）有得揮。「Kwun Man Kong」更加一句秒殺：「自己放風點知無咩人撐，唯有縮囉，咁多廢話！」
呢頭區諾軒話唔玩，噚晚又有風聲話「瀆誓四丑」之一嘅姚松炎會去馬，九西呢區真係秒秒鐘都有上落！ ■香港文匯報記者 陳庭佳