■輸成千票仲死撐，錢志健俾人寸佢「死雞撐飯蓋」。網上圖片中西區區議會補選結果噚日凌晨揭盅，其中喺山頂選區，做過教育局政治助理嘅自由黨楊哲安攞到1,378票，大炒只係攞到394票嘅「佔中十死士」錢志健。選舉梗係有贏有輸㗎啦，不過錢志健就有特別嘅「精神勝利法」，話佢哋得票比前年區選多，去吹奏佢哋「落敗但沒有輸」，真係人唔笑狗都吠！建制派就話厚道啫，「本土派」又點會放過恥笑佢嘅機會吖，成班人寸佢輸成千票仲喺度死雞撐飯蓋，正好反映佢作為「死士」但係無死到，同埋佢的確係一個最叻玩弄數字嘅「芬佬」（基金經理）！
由錢志健做召集人嘅「2047香港監察」，本來都認輸兼同支持者耍冧㗎喇，不過佢本人唔知係咪越諗越唔忿氣，喺facebook話自己「落敗但沒有輸」，因為自由黨嘅得票比「去年」（其實係前年）跌咗459票、7.52%，而「2047香港監察」嘅得票就多咗77票、7.51%，結論係「我們沒有勝出選舉，但卻贏了人心！」
被恥笑「輸成千票」仲自瀆
嘩，咁都得？屬於「本土派」嘅港大學生會刊物《學苑》前副總編輯王俊杰，就cap（截）咗錢志健圖，話自己睇完「笑到gap gap聲」，「輸成千票仲喺度打飛g（機），俾（畀）你條友嬴（贏）到就真係香港民主最黑暗一日喇。」「腎弟」盧斯達睇完亦都生眼挑針：「咁打飛機法。」自稱淨係識鬧人嘅fb專頁「百彈齋主」，今次就好好口，話建制派輸咗會諗點解之後再嚟過，但係要班「泛民」、「左膠」、「黃絲」認錯認輸就難到乜咁，「『失敗乃成功之母』又有幾多人真係識講，又識做？輸成千票，都叫無輸，真係呢......」
「Charles Low」就寸錢志健作為「死士」但「佔領」行動期間無衝到：「落敗但無輸，死士都唔死。」「Lee Ka Fai Hilton」就針對佢基金經理呢個身份：「玩數字，基金佬最叻。」
「Quentin Cheng」亦都加把口：「芬佬（基金經理）專長係販賣假希望。」
其他補選結果，喺東華選區方面，民主黨伍凱欣攞到1,034票當選，獨立嘅小學校長呂錦强攞到909票，前工黨成員劉舒燕得20票咁多。 ■香港文匯報記者 陳庭佳