英國前自由民主黨黨魁阿什當在港期間，在一午餐會上聲稱倘香港的情況「惡化得不適合居住」，英國應該向持有BNO的香港人提供居英權。有「港獨」組織即刻好似食咗興奮劑，即時廣傳並叫人盡快申請BNO喎。不過，就連唔少「獨派」支持者都唔信英國人會咁順攤，話「要畀一早畀咗啦」，而講說話嗰個只係一個過氣政客，真係信佢一成都死。
阿什當在外國記者會午餐會上，被問及會否為持有BNO的港人爭取居英權時聲稱：「如果香港的環境受到任何力量影響，導致BNO持有人感到『脆弱得不能繼續在此居住』，我非常同意擴大BNO至擁有居英權。」
講完戴頭盔 話唔係「即推」
不過，他也即時戴返頭盔，話自己唔係講話要「立即推動」，更承認目前而言，香港特區護照比BNO更為有用，但「若果」將來證實香港「不適合」BNO持有人居住，英國就有需要準備好作此「慷慨之舉」云云。
人哋講吓啫，班自稱「愛香港」嘅「港獨」組織就即刻無限ff。幫「本土民主前線」發言人梁天琦搞過幾次英國論壇嘅「文政網」，就即刻轉發有關消息，仲話「未續期BNO 持有人，請盡快申請。以便統計人數及提出有效方案。」「本民前」同埋幾個「港獨」組織及支持者專頁，亦都轉載咗有關帖文。
不過，有啲「港獨」支持者就唔似得佢哋咁「天真無邪」。「Melody Lam」直言：「嘥氣啦、英國佬敢咩；係就一早做咗啦！」「Io Va Chu」也說：「英國又唔係第一日識！如果香港人真係要『投奔怒海』做難民，英國肯定係第一批關閘的國家！」「Vincent Or」更簡單直接：「英國啋（睬）你都傻。」
睇嚟呢部分人有啲都明知道，外國勢力其實都靠唔住，只係識隨口噏搞亂人心。「Caleb Lam」直指：「政棍又出來爭取政治本錢！」「Kam Lau」說：「次次都係啲二打六無實權唔洗（使）負責做既（嘅）人出聲，真係有實權去做既（嘅）一定唔會出聲。」「William Lai」也直言：「哈哈......講咗又唔駛（使）找數。但又有很多人相信鼓掌。所以做政客真係唔難??」 ■香港文匯報記者 羅旦