下年3月立法會補選，大家食嘅花生好多都來自九龍西呢區，係時候試吓新界東出品。「新民主同盟」前日通過由咖喱飯（范國威）參加反對派初選，仲積極考慮緊嘅中大學生會前會長張秀賢即刻起晒杠，話「同范國威關係唔係咁好嘅政團會比較願意同我溝通」，即係明窒咖喱飯人緣差啫，不過佢又刻意同支持佢嘅「本土派」保持距離，話咁樣唔代表自己接近「本土派」，似乎係驚過唔到確認書呢關。自稱行「務實本土」路線嘅咖喱飯，就叫張秀賢撻朵撻清楚啲，講明係「本土派」邊瓣支持佢喎。有口痕友就覺得佢兩個都唔會攞到「本土派」啲票，今鋪一於打和啦！
聽到咖喱飯正式去馬之後，張秀賢前晚明明幫緊反對派喺區議會補選拉票，都要同網媒傾吓立法會補選。佢話雖然咖喱飯嘅議會經驗比自己多，但自己嘅熱誠和前線經驗更勝一籌，而且可以同各個派別合作喎。
不過，佢講講吓又扭扭擰擰，一邊話有「本土派」支持可以增加參選嘅「正當性」，但又話咁樣唔代表自己接近「本土派」，只係反映「本土派」相信佢可以令成個「非建制」光譜合作。
張秀賢本身係被控多條妨擾相關罪名嘅「9男女」之一，但佢話唔擔心場官司會影響參選，因為「法庭都未判，判咗都可以上訴」喎。
范國威自詡可獲「本土派」支持
俾人寸人緣差寸到應一應，咖喱飯還拖話自己做過「民陣」召集人，最近又同過百個團體反對「一地兩檢」，能夠同各方協作，加上5年前立法會選舉只有佢同毛婆（毛孟靜）提倡「本土」，有信心得到「本土派」支持喎。
佢仲針對張秀賢無政績無樁腳，話代表反對派出選嘅人應該有立場、政績同堅實地區工作，「不能只有單一一環」，仲叫對方講明得到邊啲「本土派」支持：「係『勇武本土』、『港獨』、游蕙禎、黃台仰定係邊啲呢？『本土派』光譜都好闊。」
不過，「Chris Yuen」就質疑咖喱飯得罪咁多人，仲話自己可以同其他人溝通，「淨係白鴿（民主黨）、『本土派』射落海都唔會益你」，而「Angus Hong」就話張秀賢係「左膠」學聯出身， 幾時有「本土」過，最後大家嘅結論係：「所以兩個都唔會攞到『本土』票。」 ■香港文匯報記者 陳庭佳