■張秀賢稱「野生捕獲」鄧家彪。所謂「講就兇狠，做就毓民」，激進反對派講起嘢上來就勢兇夾狼，咩嘢「革命」，「唔怕流血」，但有事就自己坐的士走先。有意參加明年立法會新界東補選嘅學聯前常委張秀賢，前晚就遇上工聯會嘅鄧家彪，仲牙斬斬話要質問對方，結果當然冇件事，仲話係因為對方「逃走」咁話，結果鄧家彪就挑機叫佢昨晨去北區搵佢，結果張秀賢話自己有到北區，但就完全冇下文。唉，大個仔（㗎）啦，咁樣呃Like係冇用（㗎）！
牙斬斬話要質問 點知冇件事
話說張秀賢前日傍晚六點幾喺fb上載咗張隔住幾丈遠、影住鄧家彪同街坊傾偈嘅相，話自己喺坑口擺街站講巴士減價問題時，「突然野生捕獲到鄧家彪」，仲問：「大家有乜想問佢？」搞一大輪，都有十幾個留言嘅。
其後，佢又上載另一張鄧家彪已離開的照片，話「民建聯、工聯會、新社聯鄧家彪呢，就趁住我同緊街坊傾緊計（偈）嘅時候逃脫，得返幾個細嘅同埋一堆旗海、易拉架陣......」喎，仲標註咗「關鍵時刻又走人」、「認真派傳單唔好揸流攤」等字句。
屈阿彪「逃走」呃Like
少年，你要問一見到對方就衝上前問啦，既然冇膽問嘅，點解仲要屈人「逃脫」呢，唔通咁樣顯得你「勇武」啲？鄧家彪睇到張秀賢嘅帖文，就上載咗幾張自己當時去咗參加香港康樂事務職員總工會15周年會慶暨會員大會嘅照片，並發文「回答中大校友張同學」。
他在帖中說：「阿彪去咗邊？原來，我同陳家珮（新民黨區議員）去咗工會活動，聽前線公務員心聲。講明同舟共濟，一整日，阿彪接觸中產─基層─打工仔─小商戶─大學生，聽佢地（哋）心聲，香港係由大家組成嘅！想狙擊阿彪，明（昨）早七點去北區搵我啦。」
不過，似乎冇嘢可以阻止張秀賢抽吓水，佢昨日就再發帖，話「乜咁啱呀！我今（昨）朝真係喺北區。繼續街站宣傳關注免收巴士隧道費呢個議題！」佢仲問：「咁你幾時先當面同我傾計（偈）」喎！
事實上，鄧家彪昨日上午真係喺祥華邨講佢嘅巴士服務倡議，包括為方便北區居民，要求開設粉嶺直接到達大埔拿打素醫院的巴士，同要求九巴開更多行經大欖隧道的巴士線（定價要較低廉），避免吐露港塞車問題。佢吊喺fb直播添，你張秀賢如果真係咁想搵對方，點會搵唔到吖？後生仔，唔好多多藉口啦！ ■香港文匯報記者 羅旦