梁振輝 香港資深出版人
婷婷：輝仔，記唔記得嗰個「臭口棗1」呀！
輝仔：把口臭成咁，實記得喇，仲不時都有人同我講佢傳啲口臭嘢㖭！做乜「無情情2」提起佢？
婷婷：你冇入中學個同學群組，就梗係唔知最近發生乜事喇！呢幾日佢喺嗰度傳啲料，真係好過分，睇到我「眼火爆3」！
輝仔：又口臭到邊個呀？關你事定關我事呀？
婷婷：玩估下！
輝仔：又喺度傳乜呀？係咪傳我「香咗」呢？
婷婷：咁都畀你估到！
輝仔：佢乜嘢唔傳得出吖！前年佢傳我有日本腦炎，就快「釘」；舊年就傳我感染禽流感，等「摺」；而家傳我「瞌埋眼」，意料中事喇！咁點傳法吖？
婷婷：早兩日佢咪喺群組度「繪形繪聲4」，話有人親眼睇到你條「柴」喺病房度「拉」出嚟囉！
輝仔：咁即係「拉柴」喇，咁激！
婷婷：唔止，琴日佢又話有人走去院方求證。究竟你同佢有乜仇口，搞到佢係咁傳你「收工」呀？
仔：讀書嗰陣爭女啩？咁有咩結果吖？
婷婷：咪話證實咗你「冚咗旗」囉！
輝仔：明眼人一睇就知吹水喇！「冚旗」，的士佬咩！如果係醫護人員，係講「Certified」嘅！
婷婷：輝仔，你真係「心水清5」！
輝仔：早排去睇相，睇相佬批我命硬，所以咒我冇用嘅，邊有咁快「Game Over」（玩完）呀！
婷婷：話時話，「年尾流流6」，我哋呢排開口埋口都講「死」，係咪唔係幾「老黎7」呀？
輝仔：婷婷，唔叫你做「神婆8」都唔得；「後生搖搖9」，咁迷信嘅，百無禁忌吖嘛！
婷婷：你唔迷信？唔係就使乜搬睇相佬出嚟吖！正一有口話人，冇口話自己！
棺材入土前先上「蓋」、後上「釘」，謂之「釘蓋」，所以「釘咗」就是死了。
「香咗」的由來坊間有兩個講法：一個是拜祭先人時會燒「香」；另一個是屍體腐爛後會發「臭」，因忌諱而說成「香」。筆者則認為「香咗」中的「香」應源於此--棺材的材料多為樟木，木料會發出一股「香」氣。廣東人有句「聞見棺材香」。試想，人若不是無限接近死亡，又怎會聞到棺材的「香」氣呢？
「摺咗/摺埋」，其實係由「執咗/執埋」演變過來。廣東人叫「結業」做「執咗/執埋」。「死亡」可看成「人生結業」，所以有人以「摺咗/摺埋」作為死亡詞了。通過以下的音變：
執（zap1）；變韻母 → zip1；變調 → 摺（zip3）
「執」便變成「摺」了。以「摺」作為「執」的借字，筆者認為適當不過，皆因「關門」的動作像「摺」東西，而「關門」亦指「結業」。
「死亡詞」中，有「瓜柴」，也有「拉柴」；那是否「拉」可代「瓜」，又或者「拉」另有所指。有說，「柴」此時不指「屍」，而指「棺木」。人死了，其「柴」會被「拉」（拖）去埋葬，那就是「拉柴」了（棺木不是「抬」去埋葬的嗎？）。筆者認為情況可能是：「柴」仍指「屍」。相傳人死了，有勾魂使者把其魂魄「拉」走，留下的是那副軀殼--「柴」。廣東人叫「留下」做「落低」，其中「落」取「賴」這個讀音，而「賴」通過變調就成「拉」，因而有「拉柴」這個講法。
舊式的的士計程器（taximeter），俗稱「咪錶」，有個手柄式的設計，看上去像支「旗」。把旗按下，「咪錶」便開始運作。
在暫不接客的情況下，的士司機會以印有「暫停載客」的紙皮套蓋上「咪錶」，俗稱「冚旗」。由於這個行為有停止運作的意思，有人就以「冚旗」作為死亡的代詞了。
以「Certified」代「死」，這應與近年頻繁播放的醫學劇集有關。「Certified」其實係由「Certified Dead」而來。一般來說，當醫生發覺某病人持續沒有呼吸、心跳、脈搏和瞳孔反射時，該病人就被「證實死亡」（Certified Dead）。有人在說人家死了時會把「Certified Dead」中的「Dead」收起，只以單一個字「Certified」來表示，或許是想避提「Dead」（死亡）罷了。廣東人形容「死」做「乜咗物咗」，香港人就創造出「Cert咗」這個中英夾雜的死亡講法了。
_______________________
1、「臭口棗」演變自一種叫「笑口棗」的油炸食品，是對那些口沒遮攔的傢伙的謔稱。
2、「無情情」中的「情」指狀況。「無情情」就是指沒在什麼狀況下，亦作「無端端」。
3、「眼火爆」指眼神充滿了激烈的火藥味，意為對某人的所作所為極度不滿或甚為惱怒。
4、「繪形繪聲」是「繪影繪聲」的廣東版。
5、「心水」應由「心緒」演變過來，只是「緒」讀時變調而已（「緒（seoi5）」→「水（seoi2）」）。「心水」指內心的情緒，現泛指喜歡、偏愛。廣東人的「心水清」指不含糊的心理狀態。
6、中國人重視「好頭好尾」；「年尾流流」，即年尾之際，最忌聽到一些不吉利的說話。
7、「老黎」中的「黎」，讀「黎4-2」，本字是「利」。「唔老黎」，即「唔老利」，亦即不吉利。
8、「神婆」經常說神道鬼、十分迷信的女性。
9、「後生搖搖」中的「搖搖」的本字可能是「姚姚」--美麗盛大貌。此詞暗喻：年輕人，正值生命綻放的年代，應積極進取、毋過分保守。
【專欄簡體版】https://leoleung2016.wordpress.com/