立法會周四繼續辯論臨時撥款決議案時，開頭聲稱要阻撓嘅反對派連做臨時演員都唔認真，只留一人在會議廳，其他全部唔知去咗邊。佢哋班激進支持者梗係鬧爆啦！其中尤以事發至今當無件事嘅公民黨黨魁戇橋（楊岳橋），當時去咗探監打卡嘅咖喱飯（范國威），同埋接受緊電話訪問嘅朱隊友（朱凱廸）最多人鬧。3條友近日開嘅post，都有唔少人留言痛罵，話佢哋只係得個講字，會都唔開，「點解仲要投票畀你呢班友？」
金句包括「關鍵一席」、「坐監令人生更精彩」、「必死決心」嘅戇橋當日係「失蹤人口」之一，但佢從來冇回應過點解嗰日冇去開會。佢昨日發帖，話自己同其他反對派中人在大圍站外擺街站，呼籲市民做選民登記 。唔少網民喺帖子留言鬧佢。
批戇橋道歉都冇句
「Sam Cheung」就道：「投票俾你班×街入去養你地（哋）？投（票）都唔識投，開會又唔開，連選民都唔回應，食屎喇！你有必死既（嘅）決心？你連必醒既（嘅）決心都無！」「Tomy Ho」也道：「千億臨時撥款會議你人影都無，連道歉都無點樣投比（畀）你地（哋）？」
此前被批評自高自大、一意孤行、搞選舉但唔尊重反對派「初選」而累蟲炎（姚松炎）落敗嘅朱隊友，到罵聲稍息先至夠膽開始喺fb蒲頭講返嘢，而呢次口口聲聲要阻撓臨時撥款但就掛住接受電話訪問冇開會，當然新仇舊恨一齊嚟。
佢最近出post質疑國歌法本地立法，「Tommy Chan」就留言揶揄：「一味係（喺）fb講到天花龍鳳，但就係立法會玩失蹤，你話佢晤（唔）岩（啱）佢就扮聾，你話呢d議員有乜用？」
「Sara Wong」亦話：「遲唔做訪問，早唔做訪問，係都要揀會期之日，表決之時做訪問，做d（啲）咩訪問咁爸（巴）閉要刻不容緩呢，點都講唔通囉！」「Thomas Wong」就攞蟲炎輸一事再講：「去到點票必輸，怎樣拉也沒有用，自大自以為是狂妄，才失去補選的兩個位。」
咖喱飯抽舜水反被寸失蹤
剛上任第二日就去咗打卡嘅咖喱飯一樣俾人鬧爆。佢喺fb諗住抽民建聯新任議員鄭泳舜水，話佢未有報名加入《廣深港高鐵（一地兩檢）條例草案》委員會係「懶隋」。重點唔係佢文盲地將「惰」寫咗「隋」囉，而係邊個懶到會都唔開。
「呆靈 」就留言質問：「咖哩（喱），你尋日（周四）去左（咗）邊阿（啊）？」「Sum Cheng」也道：「威哥，人哋尋日（周四）假假哋都有開財委會續會，你呢？」
有其支持者試圖借抹黑鄭泳舜來為咖喱飯開脫。「Rex Liu」稱：「人地（哋）㩒掣機器黎（嚟）架（㗎）咋！」「Anthony Wong」就秒殺：「有人（咖喱飯）連掣都無㩒......」
■香港文匯報記者 陳川