■「 Lance Yan」發佈該輯相片，更強調不得轉載，但網友踢爆佢散播謠言之後，又不負責任地回應。 fb截圖喺反對派中人眼中，任何人都可以係黑社會或者佢哋想像嘅國安。「自決派」立法會議員朱凱廸（朱隊友）的團隊成員「Lance Yan」，上周六喺facebook貼咗多張當日民陣遊行嘅相出嚟，含沙射影咁話「遊行去警總有咁多大陸人同黑社會」，又話人哋「疑似國安」。相關帖文仲俾多個激進反對派嘅fb專頁轉載，但原來只要稍稍查證，就知道相中人其實只係警察，仲有佢反對派同路人𠻹。該名無啦啦被指為「國安」嘅反對派中人質問「Lance Yan」「理據及判斷何來」，仲揶揄佢︰「原來係資深社運人，咁資深法幾得人驚。」
同道當「國安」 警官當「黑幫」
反對派一向熱衷於製造恐慌。曾經喺立法會幫過蟲炎（姚松炎）助選嘅朱隊友嘅豬隊友「Lance Yan」，上周六言之鑿鑿咁上載咗一堆相，聲言民陣遊行時俾「國安」同「黑社會」𥄫住喎，仲懶係有陰謀咁話「何許人如此威風」，可以同當日睇住遊行嘅指揮官交頭接耳喎。
呢個看圖作文post，咁就吸到290個反應同埋259個share（轉載），包括「東區本土關注組」、「有傘．友聚 」、「生於亂世」再加埋「佔中三丑」之一嘅陳健民都有份，播謠真係話咁易。成班人講佢就信嘅網民亦紛紛留言，「Tom Tsoi 」話：「警匪合作？香港已淪落到咁 !」「Chiu Kai Wong」就話：「警察要黑社會保護，不如直接取替警察啦！」「Lap Shing 」道：「著（着）起恤衫西褲都賊眉賊眼……」
「Lance Yan」係資深社運人
咁事實上相中人係咩人呢？其實如果睇多啲唔同fb專頁，就可以留意到「如此威風」嗰個人其實都係警察，而且都係指揮官𠻹，唔知點解啲反對派中人會覺得警察之間同同事講工作嘅嘢會有問題呢？
中傷警察雖然過分，但更好笑係佢哋竟然鬧埋自己人。其中一個被點相嘅反對派同道「Nick Stranger」出post怒問︰「呢條友係乜水，我有幸變做國安囉！」「Lam Hong」就開始做和事佬︰「Lance係資深社運人，誤中副車冇惡意的。」
「Kenny Hau」反問︰「無惡意就可以咁樣話人係國安？」「James Lee」怒斥︰「白痴『靚屎（Lance）』快×Ｄ（啲）去死啦，『城寨』（網台）低能仔。」
「Nick Stranger」似乎越諗越嬲，連環留言話︰「指我係國安或拍攝在場人士大頭，理據及判斷何來？我初初以為係入世未深既（嘅）『黃絲仔』出post，原來係資深社運人，咁資深法幾得人驚。」再留言笑佢話「國安」影集會人士相分明係搞笑︰「而（𠵱）家集會已經係360度有cam（鏡頭），有無國安係（喺）入面影，有咩關係？要防人搞事都唔係佢個樣啦！……出席集會係會比（俾）自己人誤會，那還有意慾嗎？」
「Lance Yan」自己都即刻留言認衰︰「對唔住，我立即刪除。為閣下帶來不便和誤會，我向你道歉。」
所以呢，佢哋成日話俾國安同黑社會騷擾喎，你唔係信佢哋啩？■香港文匯報記者 范童、甘瑜
