■曾素麗缺席教育及福利委員會同衛生及環境委員會上半年全部會議。網上圖片反對派成日唱衰建制派議員缺席會議，「唔可以」為民發聲，但原來佢哋喺呢方面先係「專家」嚟㗎！好似喺沙田區議會，民主黨嘅曾素麗參加晒7個委員會，但佢竟然缺席其中兩個委員會今年上半年全部會議。同樣係反對派嘅麥潤培都唔弱㗎，參加6個委員會，個個委員會會議都缺席過。有網民更加踢爆佢兩個係全職區議員，質問佢哋𢭃咗糧又唔開會係咩玩法。
facaebook專頁「泛民可恥行為事件簿」噚日上載咗沙田區議員喺今年上半年出席委員會會議嘅記錄表，仲喺曾素麗同麥潤培嗰欄畫咗紅圈，溫提網民有正嘢睇。
兩委會會議全部甩底
曾素麗參加晒7個委員會，其中教育及福利委員會同衛生及環境委員會喺上半年各開3次定期會議，佢竟然夠膽死做足6次「逃會威龍」，兩個委員會會議嘅出席率係零。佢喺文化、體育及社區發展委員會、發展及房屋委員會同財務及常務委員會 ，都只係出席咗各一次會議，出席率低見33%。不過，佢就出席晒地區設施管理委員會全部3次會議。
相反，阿「牛肉飯議員」麥潤培就無曾素麗咁偏心，皆因佢唔會特別勤力出席個別委員會會議，而係喺6個有參與嘅委員會入面都試過走堂，其中喺文化、體育及社區發展委員會，發展及房屋委員會，教育及福利委員會同衛生及環境委員會，都只係各出席咗一次會議。
麥潤培喺今年上半年唯一無參加嘅委員會，係財務及常務委員會，不過資料顯示佢喺前年5月退出過，兩個月後又入返去，上年5月又再退出過，咁樣彈出彈入法，唔通想話畀人聽「打我吖笨」？
王虎生唐學良返到足
有網民話，反對派成日屈建制派唔開會係「賊喊捉賊」，同一資料就顯示好多建制派沙田區議員，好似同曾素麗都係今屆新丁嘅民建聯王虎生同新民黨唐學良，喺今年上半年就出席晒7個委員會一共22場會議。
有支持反對派嘅網民睇見呢張成績表，竟然想倒戈。「Pik Sum Wah 」話反對派平時口口聲聲幾正義，「嘢又唔做，會都唔開，點為民發聲呀！我支持民主都唔會投呢啲垃圾。」「黃棋章」就提議區議員按出席率扣糧，「選你出嚟又唔開會發聲，呃飯食！」 ■香港文匯報記者 鄭治祖