■「JoJo Wu」回帶蟎仔公開認「獨」短片，有片有真相。 fb截圖係人都知「港獨」犯法、鼓吹「港獨」就冇得參選。明年係區議會選舉，唔少人為咗𢭃議會份糧，近期都收口唔再講「獨」。不過，「熱狗」（熱血公民）「（月薪）萬二蚊副主席」鄭錦滿（蟎仔）近日又再次俾班「益友」玩，將蟎仔兩年前親口講「我撐港獨」嘅片段公諸於世。唔知成日鬧「獨派」後生仔嘅「城邦派國師」傻根（陳云根）有咩感想呢？有網民就食晒花生咁話︰「麻煩老師清理門戶。」
難抵「瘋搶」質 認完又縮骨
話說當年仲係雄心勃勃嘅蟎仔，代表「熱血公民」報名參選2016年立法會選舉香港島嘅議席，「香港文匯報忠實讀者JoJo Wu」近日就摷返一條網媒嘅選舉論壇短片，內容係民主黨許智峯（瘋搶）質蟎仔，係咁問佢：「你認唔認自己『勇武抗爭』？」蟎仔話：「我梗係『勇武抗爭』啦！」許智峯就追問佢：「我畀個勇武機會你講『我撐港獨！』，夠唔夠膽講？」蟎仔開頭只係死撐：「我點解唔夠膽講呀？」
見到佢想蒙混過關喎，許智峯即刻焗佢：「講呀！對住鏡頭講呀！」終於，大家最期待嘅畫面出現喇，四眼喺呢個時候就爆喇：「我撐『港獨』！」但之後即刻死撐話係「言論自由」嘅一部分。
網民：拎畀選管會睇
成班「益友」睇死四眼下年想選區議會，紛紛加把口。「Mandus Lau」抵死道︰「拎比（畀）選管會睇。」「Carrie Ho」扮天真咁話︰「滿滿好型呀，寶琳街坊知唔知佢咁型架（㗎）？」「陳麒麟」就食住「熱青城」最鍾意清算條水留言話︰「麻煩老師清理門戶。」
不過，「Hon Seng Yu」就話︰「呢個就算啦，許智峯仲×街過佢。」又真係幾好笑㗎，當時焗人認「港獨」嘅許智峯，唔認自己「港獨」但噚日又同埋「港獨」組織發聯署聲明去撐「香港民族黨」召集人陳浩天，認過自己撐「港獨」嘅蟎仔𠵱家就絕口不提，真係好似獎門人話齋「打和啦」，明年齊齊被DQ咁咪幾好！ ■香港文匯報記者 陳永臣