■天星碼頭嘈到拆天，余德寶仲話要「推動街頭表演文化政策」。 fb截圖旺角菜街行人專區早前就取消咗，一眾質素參差不齊嘅表演者轉移陣地，大部分就去咗尖咀天星碼頭，搞到嗰度做咗「菜街2.0」，晚晚嘈到拆天，路人旅客怨聲載道，但公民黨油尖旺區議員余德寶好似聽唔到咁，竟然仲話要「推動街頭表演文化政策」。哦，咁不如叫班唱到劏雞咁嘅「表演者」嚟你選區或者屋企附近jam返晚啦！
之前菜街行人專區仲未「殺街」，余德寶已經起晒槓（鋼）反對，話發牌規管已經足夠，仲聲言「街頭藝術」應該要保留。
當時已經有人「突破盲腸」，指出余德寶個選區位於奧運站一帶嘅私樓同居屋，同菜街相隔差唔多成十條街，佢梗係口響啦，不如叫班表演者擴闊觀眾群，去奧運站jam返晚咁話。
𠵱家做咗「菜街2.0」嘅天星碼頭，距離奧運站仲遠多一截，余德寶當然好安心咁重提佢條橋啦。佢噚日同親反對派嘅「街頭表演關注組」召集人陳穎嵐合寫咗篇文，話政府應該汲取菜街嘅「教訓」，「着力推動街頭表演文化政策」，令大家對街頭表演「重燃希望」喎。
不過，網民「Richard Lau」就覺得應該汲取教訓嘅唔係政府，而係余德寶自己嘞。
佢形容𠵱家嘅情況無法駕馭，只有徹底執法先可以根治，「已經不是規管問題，是執法問題，我唔知道你何解仲糾纏於規管？」
網民：不如去晒你選區唱
「Jeremy Tam」就叫佢慳返啖氣：「唔該你唔好再不停消費菜街議題刷存在感！知道你係反對殺街代表啦！」
「Andy Yuen」更建議：「你咁反對殺街，咪叫晒成班表演嘅去你選區度唱到夠咯，你咁醒，一定可以規管佢哋啲噪音同埋唔會有投訴。」 ■香港文匯報記者 陳庭佳