乜家陣反對派連人哋發聲反「港獨」都可以鬧到人哋收聲咁惡嘅？自稱走「中間路線」嘅醫學界立法會議員陳沛然，喺特區政府宣佈禁止「香港民族黨」運作當日，同另外34個建制派議員一齊聯署，支持政府做法，跟手就俾成班業界「黃絲」圍剿嚇到腳仔軟，先係發聲明「深表歉意」，最後仲索性退出埋聯署，呢鋪真係白色巨塔入面嘅白色恐怖！
話說反對派組織「杏林覺醒」成員黃任匡喺facebook「火山爆發」，不滿陳沛然埋建制派堆反「港獨」，仲喺個po（帖文）度加咗堆「你唔係好叻中立㗎咩」、「詐肚痛走囉」、「唔出聲冇人話你啞㗎喎」、「成日群埋晒啲壞人」嘅標籤（hashtag）。佢話一早知陳沛然「騎牆」，亦都知極少醫生會撐「港獨」，「我哋係嬲你Pierre（陳沛然）做乜一面話自己中立乜乜乜，一面又衝出嚟簽埋啲咁嘅嘢啫嘛。」
先深表歉意 再退出埋聯署
陳沛然之後發聲明，話當日的確有建制中人搵佢要求聯署，而佢本身都反「港獨」，所以「倉促同意」聯署，對引起部分同業疑慮「深表歉意」，又重申會維護香港核心價值同埋港人權利、自由，監督政府唔可以「藉打壓『港獨』之名遏制不同異見人士」??。佢仲特登喺黃任匡個po度留言，慌死佢睇唔到。
人哋篇聲明已經用晒反對派啲「關鍵詞」啦，不過黃任匡仲未收貨：「究竟係咪『西環』有人叫你簽，你睇都唔睇吓就簽咗，然後??家知道內容喇，先發覺中伏，係咪咁樣樣？定係你真心覺得應該簽份咁嘅嘢？如果係前者，就應該出份公開信，退出聯署，以正視聽；如果係後者，冇嘢喇拜拜。」
陳沛然又真係聽佢講，前日喺facebook宣佈退出聯署，重申反對「港獨」，但要捍衛港人人權同自由喎，真係應該送套超人衫畀佢笠上身扮中間超人。呢個時候反對派終於貌似收貨，「專業議政」立法會議員葉建源留言話「Great（很好）」，黃任匡就話佢「知錯能改」，不過要睇定啲先。
有人同我哋講陳沛然當日點忙點「倉促」法：朝早接受傳媒專訪，中午同出新書嘅「金刀梁」梁智鴻食飯傾醫療政策，晏晝就趕去接老婆同個囡慶中秋。又係嘅，左右逢源係忙啲嘅。
■香港文匯報記者 陳庭佳