反對派用嗱喳手段抹黑老馮（馮檢基），仲拉埋原本唔贊成老馮參選、喺2016年手握九龍西逾兩萬票嘅立法會前議員黃毓民落水，話老馮背後有「教主」黃毓民支持，搞到「教主」都想玩返佢哋轉頭。「神駒」仇思達前晚喺fb引述「教主」說話︰「如果你（李卓人）呢個×樣去選，我就一定開街站㗎！我就動員返，喂，閒閒哋開四五十個街站㗎喇真係！」似乎想齊齊大搞負面宣傳，唔少網民對此表示支持，期待見到「教主」倒「你呃人（李卓人）」米。
點解突然會激嬲「教主」呢？網民「Milk Tea」就跟到好貼啦︰「今次係肥佬黎（壹傳媒創辦人黎智英）自己挑毓民機先。 毓民已經講過好多次佢係唔支持馮檢基去補選，只不過係要捍衛任何人的被選舉權。肥佬黎動員佢所有影響的媒體去老屈毓民支持馮檢基，仲要賤格都（到）喺A1頭條新聞內登出。 語帶相關講背後勢力殊不簡單。」
網民high爆勁期待
有見「教主」諗住出嚟開街站玩嘢，唔少人都表示支持。「Stanley Fever Lee」話︰「今次如果開街站，一定盡力幫手！」「Terry Chan」笑言︰「正呀喂！從來開街站係為咗選嘅人拉票，未見過有人開街站係幫後（候）選人倒米......」上次參加過九龍西補選嘅蔡東洲亦留言話︰「係就好，我拎定枝（支）大聲公，晚晚去美孚新邨開咪聲討李卓人，聲討民主霸權。」
仲有網民獻計講點樣數臭「你呃人」。「Victor Ckh」話︰「淨係講佢支持修改《議事規則》，將驅逐行為不檢議員嘅權力擴大到事務委員會主席上，限制立法會議員嘅言論自由，加上播埋『教主』7年前立法會段片，都可以播足半日。」唔知係咪覺得今次反對派有意參選嘅人都太不堪，「Chau Kimmins」進一步話︰「唔好迫毓民出山，真系（係）贏埋都仲得。」
■香港文匯報記者 甘瑜
