■楊逸朗數臭舊東家刻薄，但可能呢?就係「精彩人生」一部分呢！ fb截圖公民黨黨魁戇橋（楊岳橋）曾經講過「留案底會令人生變得更精彩」呢番「偉論」，唔知因為喺立法會外縱火而入冊嘅樹仁大學學生會前會長楊逸朗，聽完會唔會想煎佢兩巴呢？佢日前自爆出冊後曾經喺《明報》打過一個月工，月薪九叉嘢，不過由於返唔足一整個月，最後攞得8,400蚊，數臭舊東家陰濕取巧。不過，讀書時做過輔警嘅佢，即使攞足晒份糧，都同輔警底薪爭一大截！亦都有口痕友問到，點解係《明報》而唔係反對派喉舌《蘋果日報》請佢，話晒佢反政府無功都有勞吖！
話說旺角暴亂3周年當日，「港獨」分子喺香港大學集會，當然有楊逸朗份啦，其間佢仲大大聲用粗口鬧網媒《時聞香港》女記者𠻹。佢第二日喺facebook引述《明報》有關報道，表面上就幫自己辯護，「講粗口咪講粗口」，實際上就力數舊東家陰濕取巧、刻薄無賴。
鬧《明報》扣糧陰濕
上年6月提前出冊嘅佢話，9月喺《明報》做咗一個月臨時工，講明薪金一共9,000蚊，返星期一至五，而佢因為監管令規定要返工所以做住先，點知最後出糧出得8,400蚊。佢引述，《明報》嗰邊話因為佢無返足「一整個月」，所以要扣返糧。不過唔知點解，佢前日刪咗呢個帖文。
一個大學畢業生坐完監後變成月薪8,400蚊，高定低好難一下定論，但睇返佢以前讀書時做過輔警，如果冇參與過違法「佔中」、冇縱過火，即使畢業後搵唔到長工，如無意外都仲可以做住輔警先，而輔警底薪係768蚊一日，一個月做廿日，就有15,360蚊落袋。佢打《明報》呢份工，都係一個月做廿日，即使攞足9,000蚊，都爭成6,000幾蚊。
網民召喚戇橋解畫
「Shing Yan Lee」就召喚戇橋出嚟計計條數：「有請公民黨人生精彩議員楊岳橋出嚟解畫。」「Tim Lee」就寸楊逸朗抵死：「精彩人生，第日一定出人頭地威比（畀）我哋睇！」
亦都有好多網民好困惑：點解唔係專反政府嘅《蘋果》請佢？「Wai Wong」就試吓幫《蘋果》兜，話《蘋果》越做越縮，就快執咁話。「Baldwin Chan」就問：「乜冇『犯民』政棍請你做議員助理咩？」 ■香港文匯報記者 陳庭佳