■訟黨彭顯圖竟然話新家園社工的離世係「報應」。 彭顯圖fb截圖「飯民」𠵱家嘅水平低到咩地步？咪就係低到會因為政治立場唔同，所以覺得人哋離世都係「抵死」囉。話說日前有個新家園協會社區發展主任喺屋企暈倒昏迷，送院後不治。當《蘋果日報》報道呢件事都以《事主顧家愛妻女 專責協助弱勢社群》為題嘅時候，公民黨新界東支部委員彭顯圖竟然喺facebook出post話佢係「報應」。有網民對呢啲黑心言論極為憤怒，截圖鬧爆彭顯圖「人格可恥，猶如禽獸」，彭顯圖隨後刪post扮冇事，但俾人踢爆時就話「吹呀」，隨即俾網民寸佢︰「想做政棍真係要等第二世。」
彭顯圖日前喺fb度轉載《蘋果》就嗰個社區發展主任離世嘅報道，然後就寫咗句「『陳為註冊社工、新家園協會的社區發展主任』，真係唔係黑心，做乜野（嘢），係有報應。」
因為人哋喺建制團體服務社會，自己作為「飯民」就講啲咁冷血嘅說話，當然引嚟唔少網民睇唔過眼。「Chu Kwok Wah」就將彭顯圖個post截圖轉貼，點佢名話佢「人格可恥，猶如禽獸」。「Louis Wong」就留言鬧彭顯圖︰「係禽獸都不如。」
刪帖被發現 爆粗鬧網民
彭顯圖明顯知自己瀨嘢，隨即刪post，但再俾「Chu Kwok Wah」踢爆，佢就索性耍無賴留言話「吹呀」。俾網民寸多兩句，佢自己一邊抵唔住頸要回應，一邊又話當人「玩具」先同對方玩，講多兩句佢又老羞成怒，爆晒粗咁回人︰「×碌，如果你由細到而（𠵱）家未錯做過×事既（嘅）就繼續踩。」真係刷新「飯民」言論嘅小學雞極限。
甩底無找數 反話人唔追
「Wing Leong Szeto」就留言寸彭顯圖︰「想做政棍真係要等第二世......依（𠵱）家啲政棍大部分都係豬狗，但佢哋都會披上羊皮扮純良，而佢，扮都唔扮，政棍？下一世啦！」
彭顯圖原來早就同「Wing Leong Szeto」有私人恩怨，攻擊對方係「吞朋友錢」嘅導遊，點知俾人踢爆返佢走數。「Wing Leong Szeto」話︰「n年前去沙頭角禁區單野（嘢），你報咗名冇去，啲錢都係我幫你俾（畀）呀×頭。」
彭顯圖就直認走數單嘢，話︰「拎張單黎（嚟）我俾（畀）返你。」「Wing Leong Szeto」膠都費事派畀佢︰「嗰陣你唔去就無聲無息，咁多年後就叫我攞張單俾（畀）你？冇×嘢呀嗎（嘛）？」但彭顯圖耍起無賴都幾出神入化︰「 甩底係唔岩（啱）呀，但果（嗰）陣你係有責任問我收返錢架（㗎）嘛，你點做導遊架（㗎）？」
「飯民」咁「人才」輩出，街坊第時揀人服務自己時真係要睇路啊。 ■香港文匯報記者 甘瑜