■網民發帖揶揄吳文遠使乜眾籌喺《蘋果》登廣告咁大陣仗。 網上圖片社民連主席吳文遠用落廣告一招想奚落全國政協副主席梁振英，係咪可以達到佢「殺敵一千」嘅目標就唔知，但肯定已經「自損八百」。噚日個廣告一面世，吳文遠又拍片又貼圖又出文咁大肆宣傳自己的「政績」，唔少人都覺得佢呢種精神勝利法真係傻氣到令人唔敢睇，質疑件事除咗供養《蘋果》肥佬黎（黎智英）、令CY個監察行動更多人關注，同埋商戶以後唔敢再喺《蘋果》落廣告之外，到底班「飯民」得到啲咩？有網民神回話可以令吳文遠大刷存在感，於是就有人質疑，「（廣告內文）開頭講果（嗰）個『過氣政治人物』係咪吳文遠本人？」
吳文遠被譏刷存在感
吳文遠自以為是，卻不知反對派唔少人都好鄙視佢呢個舉動。曾經做過電視台記者嘅柳俊江都忍唔住出post問︰「發洩一下（吓），無問題。但係賣完廣告，又點？......政治娛樂化，結果可想而知。」
雖然有人寸柳俊江「又有咩高見」，但其實唔少人對柳俊江嘅講法都有共鳴。「KH Wong」話︰「好似放煙花甘（咁），放完就無，衰×過馬會買六合彩，人地（哋）都叫買個希望，呢16萬（元）係跌入黑洞。」「Lee Carson」更直接︰「無效果，×到一個點。人地（哋）仲要大方回應多謝宣傳串（寸）×你行人路大將軍（吳文遠）。唯一重點係幫肥佬黎實體報紙推業績，一切都係生意。下次又諗住籌幾多錢射比（畀）肥佬黎？」
不過，有人就醒起之前社民連收肥佬黎捐款，揶揄吳文遠登廣告使乜眾籌，月尾扣數咪算囉。
有人就問吳文遠點解唔做返啲實事。「無敵神駒」仇思達就話︰「社民連就係實事不做，只顧務虛的『泛民』政棍。籌十幾萬走去登報揶揄梁振英，都唔去幫『抗爭者』籌安家費，或者投入資源去反對佢哋聲稱比『23條』更辣嘅《逃犯條例》修訂，簡直係多餘。......殊不知CY大方回應，一句『多謝宣傳』更是四両撥千斤。」
有機會要籌款打官司
「港獨」組織「勇武前綫」都奚落番吳文遠轉頭︰「玩膠玩到不倫不類，以為可以令對家好尷尬，實情係：有條白痴自己衝出來送個靚位比（畀）我入，律師信又可以寄一堆......戇×仔！」「Wimg Wong」更絕核話等睇吳文遠因為登一個戇居廣告而俾CY告到籌款打官司。
仲有大把人鬧吳文遠成件事勁膠。「Mark San」一針見血話︰「佢唔係做實事，係做×事。」「Steven Leung」揶揄︰「『泛民』一向都自high當成功。」「Francesco Yip」亦話︰「吳文遠都成功刷存在感。」「Wang Leung」笑埋附和吳文遠班人︰「最搞笑係成班深黃傻粉又×衝去買，人地（哋）落頭版廣告係想多啲人睇，有多啲生意賺多啲錢，佢地（哋）就自己出錢賣廣告自己比（畀）錢買返晒。」
有人就鬧吳文遠幫《蘋果》嚇走晒啲廣告商。「Takki Ma」話︰「玩爛《蘋果》個場，真廣告商更加唔敢落場。」「Ellopy Lau」亦問︰「搞到咁大，啲廣告商會唔會真係唔敢落廣告？」
被揭法律問題唔敢答
至於吳文遠俾CY捉到法律問題，回應CY時又唔敢答，電台DJ「健吾」亦問︰「明明咁大間報館，唔係有法律部架（㗎）咩？咁多『泛民』中人都係律師，唔係有人教路架（㗎）咩？點解會出個咁既（嘅）聲明，冇答到人野（嘢）既（嘅）？人地（哋）問你個『有限』係（喺）邊度黎（嚟）嘛，唔係咩？」 ■香港文匯報記者 甘瑜