■郭偉強憤怒離開會場。 香港文匯報記者劉國權 攝咩叫好大嘅官威？問吓主持會議嘅民主黨涂謹申就知。噚日個會開到成班反對派議員係咁叫係咁嘈都唔使趕走，但工聯會郭偉強嘅一句「唔好扮垃圾」，就俾涂謹申視為人哋鬧佢「垃圾」，仲因為人哋唔肯收返，就要求工作人員「請」郭偉強離場，而明明郭偉強自己就肯離場。咁到底郭偉強有冇冒犯呢？大家睇吓就知。
涂︰郭偉強議員，你頭先係咪有一句說話話我係「垃圾」？
郭︰我冇開咪講。
涂︰因為我聽到你、你望住我、指住我話我係「垃圾」。係咪啊？對唔住吓，我覺得你呢句係冒犯我嘅，你願唔願意收返呢句說話？嗱，我畀少少時間你考慮吓好冇？
郭︰主席，如果你聽得清楚、你隻耳咁靈嘅話，我係叫你「唔好扮垃圾，畀返少少尊嚴自己」。
其他議員︰唔係話你係垃圾啊，並冇話你係垃圾。
涂︰郭偉強議員，我覺得你呢句都係冒犯我嘅，係違反「議事常規」嘅。
郭︰冒犯你自己，因為你自己心虛。
涂︰你願唔願意收返先，我想問你？
郭︰我唔會收返。
涂︰好，我畀多次機會你好唔好？收唔收返呀？
郭︰唔收返。
涂︰OK，請工作人員請郭偉強議員離場。
郭︰（自行離場）你自己唔尊重自己。
郭偉強會後批評，反對派拉布手法低下、醜陋，是立法會之恥，「相信任何人對這些欺世盜名的政棍予以譴責及表示強烈不滿。」
他表示會去信議事規則委員會委員，會盡快寫信予議事規則委員會主席，提出修改議事規則，初步有兩個方向，分別是明確釐清主持會議的議員的職務，及更改由「最資深議員」出任主持人的安排，如可考慮即場互選主持人等，「只要涂謹申喺度，資深議員的光環就會被糟蹋。」 ■香港文匯報記者 甘瑜