■麥潔文教主播馬梓軒唱歌技巧。香港文匯報訊 歌手麥潔文（Kitman）作客香港開電視《娛樂頭條E-news Headline》，即場向主播馬梓軒傳授唱歌技巧。Kitman表示唱歌前，先要學會兩件事：「唱歌前嗌聲好重要，同埋平時要識得保養把聲！我成日叫啲學生唔好打邊爐同BBQ，因為會對把聲造成好大傷害！」
Kitman於上世紀90年代已經開始教唱歌，她稱多年來遇過不少奇人奇事：「我以前遇過一個學生，佢每次嗌聲，把聲都好震！後來我同佢傾偈，原來佢爸爸做針灸師，支針拮落去會係咁震，佢就係呢種感覺！所以佢啲肌肉好難平定，佢最後選擇放棄，冇繼續學唱歌啦！」
談及她1984年的經典歌《夜夜痴纏》，一直流傳是廣播界禁歌，傳聞播放時總會有怪事發生，Kitman坦言：「我都感覺過！有次夜晚聽到有人播呢首歌，突然間一片空白，好似聽唔到東西一般！首歌的前奏，我一開頭『嗚』那個位是特別令人有感覺及幾嚇人，但我覺得最緊要大家唔好那麼多邪念就沒事。（現在仲敢唔敢唱？）咩唔敢呀！我成日演唱會都唱，係指定歌曲唔唱唔得！」