黃女士：減人工都無所謂
我做零售，公司生意額大跌一半以上，同舊年暴力衝擊時差唔多，𠵱家每日嘅人流同前年比真係差天共地，有時半日都無一個客，公司已裁咗一半員工，擔心自己係下一個，聖誕同新年願望只係保住份工，減人工都無所謂 。政府防疫措施有唔少漏洞，疫情無法受控，偏偏撞正聖誕、新年零售旺季，要盡快控制疫情、「清零」，社會先可以回復正常。
李太：今年唔食聖誕餐
我丈夫做飲食業，係家庭經濟支柱，但疫情下最多放過半個月無薪假，我都要搵兼職幫補，十幾年無做嘢，即使搵到啲散工，但同老公加埋嘅收入都唔夠以前三分之二，唯有慳住使，家庭開支減得就減，小朋友啲興趣班都減少。以往聖誕節都會慶祝，一家人到酒店食自助餐，今年就唔得，一方面限聚令下都無得外出用膳，另方面亦要勒緊荷包。
