●劉頴匡（左三）涉嫌違反香港國安法，正被還柙。圖為他當日被捕。 資料圖片獄中撰文叫人「齊上齊落」 網民譏「有得走你唔走？」
喺黃絲嘅字典裡面，原來「齊上齊落」嘅正解係「有福我享，有難你當」。隨着多個亂港政棍相繼坐監，黃絲開始醞釀移民潮，但因為涉嫌違反香港國安法而正被還柙嘅劉頴匡，近日竟然寫信讚自己已經兌現「齊上齊落」嘅承諾，所以請大家唔好捨棄在囚「手足」，要一齊「抵抗移民潮」喎。不過，呢啲說話對一向都當「手足」係condom（避孕套，意指用完即棄）嘅黃絲當然冇用，佢哋仲反問劉頴匡：「有得走唔通你唔走？」●香港文匯報記者 雨航
目前已被還柙逾4個月嘅劉頴匡，噚日就透過朋友喺facebook貼文，原來佢近日喺報紙見到大量移民廣告，深感唔少獄中「手足」會因此灰心，所以就寫咗封信叫大家「抵抗移民潮」。
封信深深流露出充當咗爛頭卒嘅劉頴匡有幾咁不甘，佢提到雖然政府拘捕參與「初選」嘅「民主派」的確令社會轟動一時，但「世界係冇任何改變」，就只係多咗相對出名啲嘅人坐咗監，想像中嘅「政治衝擊」完全冇出現。眼見每日都有「手足」入獄，但就愈嚟愈多港人放棄、離開，令坐緊監嘅「手足」好似冇咩意義。
劉頴匡仲話，即使自己知道要承受刑責都「毅然選擇」留港，反問其他人「有咩理由恐懼？又有咩理由捨我哋而去？」
攬炒區員轉發 幫口鬧「煽移」者
沙田區議員趙柱幫唔知係咪睇完封信後深受感動，於是就喺fb開post幫口批評慫恿移民嘅黃絲：「有能力嘅人為求自保要移民。大家理解，唔緊要！但唔該就收聲，靜雞雞走就算。移民×仲要不斷向大眾渲染，香港依（??）家點樣危急存亡......大家唔移民唔走，就會攬住一齊死。呢類人係最×街！」
可惜兌現承諾對黃絲嚟講簡直係冇可能嘅任務，「膠液現牆」一嚟就抱住懷疑眼光：「我明佢講感受，但移民×都有佢道理，留係到（喺度）除左（咗）交稅仲可以抗爭d（啲）咩？《蘋果》都就黎（嚟）比（俾）人搞到執。」「Ray Yau」就認為劉頴匡過於天真：「睇到呢句說話我就覺得傻。逝者已逝，要人地（哋）倍（陪）埋你一起逝先至叫做『有意義』？」
「叫許智峯羅冠聰返嚟陪你囉」
心水清嘅「Leslie Lai」就攞其他攬炒分子為例反問劉頴匡：「坐監坐到傻×左（咗）？叫幾百萬香港人陪你坐好唔好？重（仲）有許智峯，羅冠聰個d（啲）『流亡』緊喎。叫埋人地（哋）返嚟陪你囉。」「阿旺晉美」更直接提起劉頴匡嘅女友：「Email（Emilia）有得走會唔走？」
「帝王司令官」就慨嘆一切都係漁人得利：「為場『運動』坐監嗰班真係好×慘，尤其係無名無姓嗰班no body，喺前線打生打死，到頭來自己坐幾年監，班冷氣軍師同中產free rider（坐順風車）移民走晒。」「Nelson Wong」就直情叫劉頴匡慳返啖氣：「唔好玩感情勒索啦，有得走你自己唔走？」