如何令「同路人」都覺得你嘅誠信破產？自稱曾被警方「性暴力」對待嘅中大畢業生吳傲雪就係一個好典範。事緣近日有網民喺「連登」開post，聲稱吳傲雪近日喺「黃店」「糖水雄」打工期間搭上咗老闆個仔A君，其後開始挑撥成間舖嘅人事關係，搞到老闆「心灰意冷」差啲想唔撈，事件惹嚟唔少批評，吳傲雪其後就衝落舖頭大喊扮可憐，又喺facebook賣慘博同情，可惜「同路人」同網民唔止唔買賬，仲直言非常噁心，叫吳傲雪收手唔好再害人。
網民「徐青藤」近日喺「連登」開post，懷疑吳傲雪自搭上A君後就不斷向舖頭其他員工唱衰老闆，導致老闆一度以為大家都唔鍾意佢而想收檔，所以「徐青藤」就質疑吳傲雪係個「操控狂」。
被知情者寸造謠能力「好出色」
疑似同「糖水雄」關係密切嘅另一「黃店」員工「Derek Pak Lun Ip」亦喺fb「讚揚」吳傲雪：「你可以憑食兩三次嘢、以一己之力將成堆人攪（搞）到各懷鬼胎、成間鋪（舖）嘅人互相猜忌父母子不和，其實以造謠、挑撥離間能力來講真係好出色。」「原來尋（噚）晚我開完post佢就衝落鋪（舖）扮演受害者大喊一場，感動人父母，嘩（哇）我棋差一著（着）了。」
唔少網民都覺得事件嘅真相已經唔重要，因為只要吳傲雪去到邊都實有呢啲事發生，好似「爆炸頭的雞」就話：「佢啲是非真係就算去到邊，轉咩環境都有，仲要係差唔多嘅嘢，真係有啲誇張，相信都八九不離十。」「BB來了」就話：「早多幾年玩『社運』都知條八婆係attention seeker（尋求注意者），唔比（俾）人×唔安樂，愈多人留意佢愈開心。」
「石元泰博」就揶揄：「一哭二鬧三上吊，留名睇鬧然後上吊。」
吳傲雪其後就喺fb開post回應事件，聲稱由於「糖水雄」啲員工經常請佢食嘢又送佢返屋企，作為回報決定幫店舖義務送外賣，強調自己絕對冇分化店內事務。佢又不斷賣慘咁話自己多年嚟一直被辱罵，更會為身邊人惹麻煩，於是好慘情咁話：「本人重申已很久沒有與親人聯絡，本人的朋友早於多年前自殺逝去，亦不奢望有異性如此勇敢排除萬難愛我。」
錢詩文回帶劣行批誠信破產
部分網民就留言叫吳傲雪加油，千祈唔好將呢啲抹黑�喺心上，但前「香港眾志」秘書長黃之鋒嘅前女友錢詩文就開post幫大家回帶吳傲雪點解會誠信破產，包括嗰頭聲稱「國家大事前，兒女私情擺後」，但轉頭就喺公開場合宣布自己啲感情事；蒙面開記者會時聲稱自己冇喺「8．31」事件中受傷，但除罩後就自稱係「8．31」事件嚴重受傷者；不斷喺社交平台擺payme code，叫人捐錢畀《蘋果日報》不如捐錢畀佢，但事後就急急刪post。
錢詩文喺文末仲好火滾咁話：「吳小姐私生活有幾亂唔關我事，但涉及『反送中運動』，亦都係一般人眼中算係『831／新屋嶺事件』代表人物之一，誠信有問題就係影響緊係（喺）呢啲事件中真係受到嚴重傷害嘅人。」「你老×真係以正視聽，容許唔到呢種人仲係到（喺度）賣小強。」 ●香港文匯報記者 雨航