|
李自明
白鴿黨(民主黨)一如所料，在周日的會員大會中否決加入總辭行列，癲狗幫(社民連)當然咬着不甘就範上轎的白鴿黨不放，對其單單打打，更用「割盲腸」來形容曾經一起「為民主而戰」的盟友。自明與政壇老友談起這一幕「政壇變臉」，老友失笑，拋出一句「狗咬狗一口毛，最後得個桔」。老友如此「神算」，建基於一份有關五區總辭的民調結果，原來51%市民反對以「5區總辭加補選變相公投」，支持的僅佔4分之一；而且49%表示不會再選該辭職的反對派議員或者其推薦的候選人重返立法會，傾向會的僅佔36%。「唔好當市民係傻嘅，你要佢哋為你嘅理念服務，佢哋睬你都傻呀！」
中立選民 被「公投」嚇親
老友坦言，民意清晰可見，而民調的最大玄機，是自稱中間派或無政治傾向者的取態，他們中56%反對「5區總辭加補選變相公投」，58%不會再選該辭職的反對派議員或者其推薦的候選人返回立法會，「睇住！全部都過半數反對嘅！一睇就知中立嘅選民已經俾癲狗幫同公文袋嚇親啦！其實香港人好簡單，亦都好識揀，只係想用手中一票選一個人為自己服務，點知班民主派宜家掉番轉來做，自己辭完職，仲要你記得投票撐佢返入去議會，為佢哋服務！到底邊個係『民』邊個係『主』呀？」
老友直言，當癲狗幫提出「五區總辭」時，已經覺得他們癡人說夢，到公文袋為爭道德高地提出23個反對派議員「總辭」時，更加覺得他們太白癡，如今事實勝於雄辯，證明所謂「總辭」根本無民意基礎，「香港人好實際，最想有發展，効全球搵到發展嘅位置，可以繁榮安定。香港從來唔係為某一個政治理念而生存嘅地方，賴以成功嘅生存之道係識走位發展。點知班反對派愈玩個心就愈雄，竟然忘記咗立會議員從來係為市民服務，反過來將一個『公投』議題加諸市民身上，仲夾硬要你投票支持！」
心存疑惑 不投票「表態」
「你問100個香港人要唔要民主，我諗無9成都有8成人答你要，但如果要香港人咩都唔理剩係爭取民主，我肯定無幾多人會『say yes』，只會問『why』？」老友說，癲狗幫及公文袋早前為逼白鴿黨披甲上陣，將「5區總辭加補選變相公投」吹捧到「神聖不可侵犯」，不參加就是背棄民主的「縮頭龜」，如今即使民調鐵證如山都要「頂硬上」，但如此走下去，可以預計花1.5億公帑的補選投票率一定好低，「唔好當香港人傻啦，香港人雖然唔熱衷於政治，但唔好當佢哋係政治白癡，真係你講咩，我信咩呀？對有疑惑嘅嘢，香港人仲會唔會撲出來支持呀？唔出聲其實都係一種表態，到時咪個個唔投票囉，香港人好聰明嘅！」
政壇老友笑說，癲狗幫及公文袋今次棋差一着，源於太過小覷香港人的政治智慧，「佢哋自以為所諗所講嘅代表晒香港市民，剩係佢哋嘅『民主』就可以讓香港人發癲。其實，民主光環係佢哋發癲想要，人民只係想食飯啫！」
|
