■陳凱琳演技一而再受到批評，小妮子坦承不開心，甚至不懂如何鼓勵自己。近日在《巨輪II》中佔頗重戲份的陳凱琳（Grace），演技一而再受到網民批評，Grace坦承為此事有唔開心過、有喊過，更曾想過放棄，幸得父母的一席話，令伊人打消退出娛樂圈的念頭。■採訪：植毅儀 攝影：彭子文
陳凱琳於2013年挾着超過17萬票成為「民選港姐」冠軍，一出道就受觀眾萬千寵愛，然而當她首次擔正演出無綫劇集《張保仔》，卻引來鋪天蓋地的負評。今次於《巨輪II》也佔頗重戲份的她，演技一而再受到批評，Grace坦承有點不開心，甚至完全被擊倒，不懂如何鼓勵自己。
學懂諗嘢要Positive些
「每次拍劇都會盡量演好劇中角色，但每次有劇出街都會有壓力，每套劇播出時，都會被很多人批評，當中有好與壞，當然會不開心，但都需要自己去調整心情。自己有唔開心，我不是求大家把一來就給予我演技滿分，但都希望觀眾睇到我的付出，每次都會加少少分。有段時間被批評到驚，因為我好努力去拍，沒諗到出來個效果如此，我好似唔記得自己有付出過努力，連鼓勵自己都唔識，甚至乎同爸爸、媽咪講唔想再做落去。但媽媽會說：『如果呢一刻你放棄了，以你的性格，將來睇返成件事，你會後悔點解當初唔堅持下來。其實你都有很多fans支持，不可忘記他們對你的期望，如果你只記負面的事，就會忽略他們對你的支持。』媽媽一番話令我明白，做公眾人物就要諗嘢要Positive些，再用自己曾經受到的傷害，去鼓勵同樣經歷受打擊的人。」
百分百背熟劇本才入廠
一輪沉澱過後，陳凱琳重拾自信，將流言蜚語化成動力，學懂自己去調校情緒。其實不少和Grace曾合作的資深演員如黃智賢、梁崢都大讚Grace勤力又聰明，梁崢早前做專訪，更大爆Grace每次入廠拍攝都不用帶劇本，只因小妮子會把劇本背得滾瓜爛熟。對於前輩的讚賞，Grace腼腆而笑，道出原因。
「因為我的中文是『有限公司』，開始拍劇的時候唔識睇中文，每次收到劇本，都是爸爸把劇本讀一次我聽，攞錄音筆錄晒成個劇本。我去理解及寫上只有自己睇得明的發音，所以我好多謝爸爸好錫我，工作咁忙都幫我手。我是嗰種要100%睇熟劇本才可安心入廠的人。好多人都覺得呢幾年因為公司鬧花旦荒，我們幾個新人都好多機會，繼而傳出我們爭寵。但我覺得做好自己本分便可，每人都有自己的工作，不會眼紅別人。細個父母已經教我唔好同人比較，就算你贏了人，也未必贏到自己，所以同自己比先會有進步。」
多謝男友實話實說
早前有傳聞所言，陳凱琳恃寵生驕，對此她坦言有點冤枉，因為沒有發生過。娛樂圈是一個令人快速成長的地方，只要你行錯一步又或是講錯一句話，無心之失便會被人無限放大，這道理相信Grace最能體會。入行3年，雖然演技多次受批評，但在陳凱琳身邊還有一個實話實說的人，這就是男朋友鄭嘉穎。
「嘉穎入行很久，我一有不開心他都會開解我。他都曾經經歷過我現在經歷的事，他可以用正面的態度去克服，而且經常用自身經驗去鼓勵我。佢會話：『人家咁樣寫係因為對你有興趣，如果唔係真，我們知咪得。』像大家話我演技咁，佢都會對我演技有評語，但不是單一地話我差，而是告訴我點去用力演。平時一齊睇戲，也會講一些演戲心得滲入我的腦，像今次演『魔女』，某些場口，嘉穎話我變化太大，令人覺得好浮誇，自己睇返轉頭都覺。拍拖年多，我們與普通情侶無異，會行超市一齊煮吓飯仔，當關係遇到問題時，會冷靜後再商討。我們不需要驚天動地的愛情，如果大家對我們再減少一點關注，生活變得簡單一點，就相當心滿意足了。」