巴治奧游BB英語辱國 搶「正經」蟲泰風頭惹火
一個莊嚴的立法會議員宣誓儀式，竟然被多個主流反對派及「自決派」中人膠化，情何以堪？有人在誓詞前後加鹽加醋，有人玩復古擔着黃傘，有人帶着鐵盒啪啪啪，有人更龜速讀出誓詞，搞到手語傳譯員攰到要換人。不過，最出位莫過於「青山新症」（青年新政）巴治奧（梁頌恆）同游BB（游蕙禎）：帶着「Hong Kong is not China」橫額，用一口「鴨脷洲口音」英語宣誓。游BB更將「Republic」讀成「Re-fu×king」，雖然侮辱自己、議會同埋國家，但就呃到唔少曝光率，將宣誓時相對正經的「熱狗」蟲泰（鄭松泰）比下去。議席數目少過人，𠵱家連風頭都細過人，一眾「熱狗」自然唔忿氣，在網上鬧「青症」做馬騮戲無用，而「本土民主前線」發言人偉哥仰（黃台仰）等「青症」支持者也不甘示弱，反問「點解唔做？」睇嚟網上世界隨時比立法會更亂。 ■記者 陳庭佳
眼見新科主席被巴治奧同游BB搶盡風頭，昨日全日靜到無影，「熱狗」對準巴游二人開火，其中「國師」傻根（陳雲）食足藥開正經mode（模式），在facebook話如果中央可以接受「青症」侮辱國體，香港人就可以「獨立革命」。
陳秀慧越洋嘲抄「教主」舊橋
陪老公黃洋達在加拿大散心的「皇后」陳秀慧，也來發一炮洲際導彈：「當一班濕×『新泛民自決派』議員，重複又重複毓民已經做過晒嘅宣誓遊戲，只有『熱血公民』嘅泰博展示出一種其他人沒有的穩重、可靠和承擔的態度。兩個層次。」「皇后」又揶揄游BB玩膠玩出火，「唔係扑嘢就係fu×king，笑死我。」
一眾「熱狗」KOL（意見領袖）也開工做嘢恥笑游BB，其中「陳到」向票投「青症」的選民說：「Enjoy what you voted（享受你的投票選擇）」；葉政淳就解讀游BB講「Re-fu×king」的意思：「從×開始的議會性生活。」
巴治奧同游BB以「鴨脷洲口音」宣誓，將「China」讀成「支那」這侮辱詞，建制派自然唔高興。經民聯梁美芬鬧二人對中國人民造成傷害，游BB就在facebook反擊死對頭，辯稱梁美芬歧視其「香港口音」，要求梁道歉，卻難防由「熱狗」成立的專頁「熱血圍頭佬」在背後插一刀：「我×你奶！你嗰啲乜×嘢香港口音啊？你做×咗幾耐香港人呀？你返鄉下扑嘢啦！臭×！咪×認親認戚呀！」
黃台仰幫拖又爆罵戰
久未蒲頭的偉哥仰，眼見盟友「青症」被「熱狗」圍咬，好早起身在facebook反擊：「無成本，又可以玩嘢，點解唔做？」晏晝偉哥仰更加直接，批評「熱狗」將「抗爭」同「宣誓」拉埋一齊講，「×人宣誓嗰陣同『左膠』一樣，先唔講拎呢兩樣嘢一齊講有無邏輯，咁你叫其他主張激進抗爭但又跟足規矩宣誓嘅議員情何以堪啊」，辣埋蟲泰嗰瓣。
「神駒」仇思達本來一心想寸「左膠」，「立法會的宣誓儀式，已經淪為幼稚園天才表演層次的表演舞台，不堪入目」，更開名問候小麗老母（劉小麗），但衰在like（讚好）咗游BB鬧梁美芬的帖文，令人覺得佢支持游BB的「幼稚園天才表演」。
另一個「熱狗」專頁「仇幼聯」就諷刺道：「根據『無敵神駒』仇思達嘅往績，同埋佢親自like咗游蕙禎議員個小學雞status（狀況），本專頁相信佢口中嘅『幼稚園天才表演層次』，係唔包括『青年新政』兩位議員嘅。」
