香港文匯報訊（記者 甘瑜）「青症雙邪」嘅宣誓案塵埃落定，率先確定立法會喺新界東同九龍西各有一席需要補選，反對派已經計好最益自己方案，認為同樣被DQ嘅新界東社民連「長毛」梁國雄同九龍西「小麗老千」劉小麗都肯繼續上訴，就可能可以將補選分開進行。不過，長毛就話有法援啫，成日呻窮嘅小麗老千自然就會問「哪有錢」。《蘋果日報》噚日就特登寫咗篇文章，大字標題話《上訴左右大局 小麗未諗掂》，擺明要焗小麗老千上訴，而當小麗老千講明有「錢嘅問題」，《蘋果》都補多「守護公義基金」發言人鄭宇碩一句，話會「優先畀錢小麗上訴用」，講到萬事具備，小麗老千唔想上訴可以點落台呢？
話「DQ基金」有280萬金援
正所謂「有強姦，冇焗賭」，咁焗人上訴又得唔得呢？《蘋果日報》噚日就DQ 4嘅上訴問題發功，標題先一句「上訴左右大局」、後一句「小麗未諗掂」，內文仲話︰「9月11日嘅上訴期限將至，小麗嘅一念之差，將會左右九西補選係咪合併進行，亦即好大程度決定『民主派』會否變相送九西一席畀建制派。」你話小麗老千大唔大壓力吖。
小麗老千回應《蘋果》時話，有關錢嘅問題唔係一下子有結果，暫時未決定，《蘋果》就即時補上鄭宇碩嘅回應，話??家佢哋個「守護公義基金（DQ基金）」仲有約280萬蚊，「優先畀錢小麗上訴用。」
唔少網民留言附和，焗小麗老千賣樓都要上訴咁話，真係強大嘅力量啊。「KH Wong」話︰「賣左（咗）層樓咪大把錢打官司囉。」「Agostinho Chok」亦表示︰「為民主定為銀紙？自已（己）過千萬身家，賣一間樓淨用賺差價果（嗰）D（啲）都夠，仲話為香港為民主？」「Luffy Lo」更進一步表示︰「×，為正義，應該好似三子咁，無懼風雨！大不了咪破產！」
其實呢，小麗老千上次只係慢讀，未有話要「港獨」之類，如果之後參加補選似乎都冇問題，但如果學「青症雙邪」咁破產，咁就起碼有幾年都唔使再諗爭議席，佢會掙扎都可以理解嘅。「小冼」亦出口護花︰「話賣層樓果（嗰）d（啲），你地（哋）賣左（咗）自己層樓捐錢未？未就收皮啦。」「Peter Florrick」更抵死表示︰「《蘋果》要支持下。 捐錢please。」
利字當頭搞小動作
小麗老千最終上唔上訴我哋唔知，但呢件事大家可以睇到，平時無論特區政府羅列幾多法律理據，反對派都仲可以屈特區政府用司法機關「打壓」佢哋，又話人哋會搞「小動作」，結果喺今次上訴問題，佢哋自己咪唔理有冇法律理據，都想用「小動作」去令補選以「合佢哋心意」嘅方式進行，所謂「公我贏字你輸」囉！