■狗達近日喺fb轉發咗一段由狗主傳畀佢嘅WhatsApp訊息，話有人恐嚇佢個孫。 fb截圖在立法會選舉中，「熱普城」5人去得1人當選，結果利窮則散，仲不斷互相清算，近日仲玩到「恐嚇」！「熱狗前首領」狗達（黃洋達）近日喺fb轉發咗一段由狗主（黃毓民）傳畀佢嘅WhatsApp訊息，話有人恐嚇佢個孫，仲話：「我收呢啲恐嚇信，全部都同你有關，唔係你叫人做都好，都係同你有關！」狗達就批評對方老屈，昨日更去警署「代」狗主報案。有「熱城」支持者更話要動員「開件老坑火」咁話，睇嚟花生期指已經急速上升。
狗達前日下午喺fb發帖，話收到狗主WhatsApp，傳來兩張圖，同留狗主嘅留言訊息，大意係話佢收到呢啲恐嚇信，全部都同狗達有關，就算唔係狗達叫人做都好，都係同狗達有關，係因狗達而起，又話自己就死冇咩所謂，但係狗達咒佢個孫就係「江湖大忌」，仲叫佢出嚟「講清楚」。
狗達就話，「唔係我做或叫人做，又點可能同我有關？明明過去一年，係閣下不斷攻擊滋擾熱血時報、鄭松泰、陳雲。自從閣下公開表明『從來不支持永續基本法』，否定過去陣營理念，往後就不斷於閣下節目攻擊批鬥舊日政治陣營。」
他續稱，「我不曉得有什麼誘因，致使閣下脫離陣營，但在這件事上，發動攻擊的閣下卻以受害者自居，實在令人費解。另外，請不要再老屈我地（哋）滋擾你家人，閣下於節目侮辱我太太，你辱罵佢做『賊婆』，我地（哋）都忍過去了，閣下不要再戾橫折曲，我們已經心滿意足。如果閣下真的收到恐嚇信件，請盡快報警。」
狗達之妻殘獸胃（陳秀慧）也發帖稱：「請不要再老屈我地（哋）咀（詛）咒滋擾你屋企人，並將恐嚇事件與我地（哋）拉上關係，然而你在大半年來節目中就正正不斷老屈侮辱我地（哋）。唔知道圖中等恐嚇信係如何收到，我嚴重提出必需短時間內報警，以搜集所有有可能證據，包括任何閉路電視或郵寄證據。」
「熱狗」「諷主」個個月都收信
成班「熱狗」群情洶湧，大鬧狗主。「水媽」張耀心就話：「（狗主）個個月都話收到恐嚇信，就冇一次去報警。上星期我喺地辦就真係畀個聲稱因黃毓民而投票鄭松泰嘅人嚇到要報警喇！」
「熱血時報」節目主持人馬啟聰更話：「我就無見過人咒你黃毓民個孫，但我就見你哋成班×人成日侮辱黃洋達嘅太太囉！......假如你真係被人恐嚇的話，咁快×啲報警啦。唔報警正契弟，講完！」
蟲泰留辦地址「抽水」
「熱狗」主席、立法會議員蟲泰（鄭松泰）就喺留言區上載咗一張佢辦事處地址及電話圖，「抽水」話：「如有需要，可隨時聯絡泰辦職員尋求協助，非辦公時間亦可。」
「熱城」支持者「劉禪」就發帖，話「老狐狸無啦啦send條咁嘅濕×錄音比（俾）黃洋達，只有三個可能性：1.諗埋d（啲）屎橋，跣×對方回錄音然後公開用節目斷章取義；2.谷花生救亡；3.以上兩項皆是」。「藍鳳凰」更發帖「動員」：「各單位注意！自動自覺埋位！準備考古開件老坑火反攻！」
到昨日，狗達就真係同殘獸去牛頭角警署「代」狗主報警。狗達話：「已經為黃毓民先生收到恐嚇信一事報案，希望盡快找出製造恐嚇信的犯人！」
殘獸則稱：「我地（哋）只能夠做到呢度，為黃毓民收恐嚇信一事報案。希望黃毓民先生能向警方提供更多收到恐嚇的過程及內容，以供調查。及早捉到犯案者及調查清楚犯案動機！」
呢單嘢嘅花生，睇嚟一定食到熱氣囉！■香港文匯報記者 羅旦