「本土民主前線」發言人獨琦（梁天琦）在旺角暴亂時煽人去「死」，現在就扮怯為自己不負責任開脫。同樣係「獨人」嘅香港大學前學生會會長馮敬恩，睇完嗰套以獨琦為主角嘅「迷惘青春故事」後，就喺fb發帖形容對方係摩西喎！唔少人當然唔同意啦，話獨琦做逃兵，結果引發馮敬恩挑機，雙方大打「口水戰」。結果，馮敬恩輸咗。
話說有網媒轉發咗馮敬恩睇完以獨琦為主角嘅電影《地厚天高》後，就喺fb發帖，竟然用摩西來比喻獨琦，又話佢係英雄又話盛，再倒果為因，明明係獨琦自己好口響話要「時代革命」，又話要流血又話盛，結果自己縮沙去「周遊列國」而被鬧爆，馮敬恩就話因為其他人對獨琦「期望太高」，到佢做唔到其他人「要佢做嘅嘢」就被「離棄」咁話。唔少網民當然好唔順氣，紛紛留言冷嘲熱諷啦（見表）！
網民：摩西冇逃避「大業」
網民「Alan Fung」直言：「唔好侮辱摩西，同暴動犯法之徒相比。而且摩西如果有機會去西環抗議，唔會上咗互動新聞後，自己即上的士閃人。」「Ashworth Nina」也留言批評：「唔好侮辱摩西，摩西無做逃兵。」
馮敬恩隨即「真身」留言挑機，引用聖經記載話摩西仲係埃及王室成員時殺人一事，質疑道：「摩西殺完人走佬算唔算逃兵呢？」「Ashworth Nina」就反擊：「佢（摩西）係成功打救一整個民族之後，先至可以被稱為英雄，請問佢殺人係打救民族之前定之後？」
馮敬恩死不認輸，繼續追問：「想問摩西算唔算逃兵，你話佢無做過逃兵嘛......」「Ashworth Nina」就指：「唔算，因為佢係逃避個人罪行，唔係逃避『民族大業』。而梁天琦啱啱相反，佢無逃避個人罪行（無棄保潛逃），但逃避『民族大業』。」
講唔過人，馮敬恩就借聖經經文話人：「你們中間若有人缺少智慧，就當向那厚賜眾人，而且不斥責人的神祈求，他就必得著（着）。」「Ashworth Nina」就以彼之道，還施彼身：「神說：『摩西為人極其謙和，勝過世上的眾人。』......領袖/想做領袖嘅人，應該學下（吓）摩西咁，有個謙卑嘅心。摩西同班手下有冇叫以色列人做以豬（揶揄『港獨』成日侮辱唔支持佢哋嘅香港人就係『港豬』）？」
「Prince Louise」就做炸兩：「推個人出來做唔到你地（哋）想佢做既（嘅）野（嘢）就叫逃避民族大業？咁民主黨點解仲生存緊既（嘅）？」「Ashworth Nina」反擊道：「搞清楚啲，你講緊邊個『你地（哋）』？邊個『想佢做野（嘢）』？作為新東選民，補選我冇投佢，佢唔代表我，我亦無想佢做啲乜嘢。」
佢仲劃清界線話：「我講緊嘅『民族大業』係用本土派口吻講嘅『民族大業』，無加引號，令你誤會，係我疏忽。」另一網民「Ken Ng」則學獎門人一樣出嚟叫打和：「你地（哋）都講錯。佢冇做過兵。佢只係一個非常出色嘅司儀。」最後，呢場「口水戰」以馮敬恩冇再留言而「告終」。 ■香港文匯報記者 羅旦