早兩日「城邦派國師」賤根（陳云根）因為俾人踢爆賣淘寶貨，失威到一班「熱青城」人玻璃心碎晒，「熱青城」中人「藍鳳凰」日前喺facebook出文話「熱狗」成日陰自己人，明明賤根只係「篩選隻碗、掛畫俾（畀）你賣」，但「宣傳圖隻字就話係人哋出品」，搞到炒晒車。好鬧唔鬧鬧埋賤根金主「熱狗」嗰邊，賤根即刻劃清界線，鬧爆自己友，話唔好「為了一個用詞、一幅圖、一句話來攻擊其他同道」喎，「藍鳳凰」等人心灰意冷到想刪fb，但「熱狗」前頭目狗達（黃洋達）就開心畀like囉。
賤根被踢爆賣淘寶貨，嬲到攞大埔車禍嚟冷血抽水，以顯示自己嘅「威力」，「藍鳳凰」亦嘗試為賤根挽回聲勢，點知就中招。「藍鳳凰」日前喺fb出文，質疑「熱時」個管理員變咗對家嘅人，成日陰自己人，令賤根被人笑用淘寶貨當做自己出品，「陳雲用字一直謹慎，反而呢啲錯誤『熱時』常見到不得了。亦唔洗（使）賴忙中有錯，年宵個個都忙，偏偏其他人冇炒車，得你炒呢啲車？......俾（畀）子彈對家攻擊，呢啲真係唔知咩玩法。」
賤根：畜牲才會忘記戰友情
不過，「熱時」話晒係狗達轄下嘅嘢，你鬧「熱時」咪即係鬧賤根金主？賤根突然又傻唔晒，噚日就出文劃清界線，話「曾經一起參與社運的朋友，好好反省一下」，又話大家出生入死，又呢樣又嗰樣咁，「現在，有些所謂同道，為了一個用詞、一幅圖、一句話來攻擊其他同道，不鬥死不甘心，這是什麼道理？忘記了七年來的合作嗎？不會吧。我們曾經在街頭並肩作戰，曾經同檯食飯，是畜牲，才會忘記這些戰友的感情吧？那些為了點小錢或意氣，倒戈相向的，是畜牲，不是人類吧？」
咁樣一出，原本幫緊賤根嘅人都心灰意冷，「藍鳳凰」就出文話︰「唔好問我點解今次有人掟屎，我會走咗去食花生，反正人哋唔介意俾人掟到周身屎。」之後仲一度刪埋fb，其後又話「暫時復活1日」，吹雞呼籲大家「永久退出社運輿論戰場，停止指出任何問題」，真係要幾晦氣有幾晦氣。
除咗「藍鳳凰」，賤根亦都去有份罵戰嘅「劉禪」fb度留言，話自己冇呢班朋友，「你們走吧，自動自覺unfriend（fb上解除好友）我。」「劉禪」就出文話︰「即使退出網戰，無論幾冤枉幾屈辱都好，日後做人處世都不可以因為意氣用事而放棄大義，這是蜀國的原則。」
其實你哋本身都咁圍爐，𠵱家彼此清算埋，以後仲可以有咩玩法呢？■香港文匯報記者 甘瑜
