梁振輝 香港資深出版人
婷婷：我有個朋友，有啲「濕熱」（麻煩）嘢，我好想幫佢，但唔知點幫！為為，今次睇你嘞！
為為：婷婷，你朋友即係我朋友，幫到我實幫！
婷婷：我朋友係個「中女」（中年未婚女性），上年喺個交友網度識咗個意大利商人，佢話佢由朝到晚噓寒問暖、由晚到朝「雞啄不斷」（不停的說），仲話搞掂手上個大「project」就過嚟娶�㖭！
為為：好一段「網上情緣」！咁之後發展成點吖？
婷婷：就係咁過咗半年，有一日個意大利佬話一時周轉不靈，叫佢匯一萬歐羅過去。先頭佢都有多少猶疑，但諗落第一次就「托手踭」（推搪），建立咗嘅感情可能就咁冇咗，咪即刻匯過去囉！
為為：唔使問，之後梗係一去無回頭喇！
婷婷：錯！唔到兩日，佢就匯番啲錢畀佢，仲畀多10%利息㖭！咁咪證實咗顧慮係多餘個囉！
為為：高招，仲博唔到佢信！咁之後又點吖？
婷婷：佢以為一切回復正常，點知過咗兩個禮拜，個意大利佬又話周轉不靈，今次話要五萬歐羅，利息照舊10%。佢諗住上次佢還得咁爽快，同埋利息都有成五萬港紙，應該博得過！
為為：嗱，唔好話佢今次「走路」（逃去）呀吓！
婷婷：都差唔多嘞！佢話成三個禮拜都聯絡唔到佢，而家「個心十五十六」（不知所措），一就驚佢出事，二就擔心收唔番啲錢，所以咪求救囉！
為為：婷婷，老老實實，嗰個懵婆係咪你嚟？
婷婷：為為，你冇理由睇得出㗎！
為為：懵婆，你嘅眼神出賣咗你嘑！
婷婷（苦着臉）：事到如今，我都唔怕認，呢啲咁嘅「瘀」（丟臉）嘢，邊個想話畀人知吖！你係我閨蜜，今次真係要幫我「拆掂」（擺平）佢嘑吓！
為為：又一單「網上情騙」！婷婷，你今勻應該係遇到「光棍」嘞！
婷婷：咁咪「衰穩」（必有所失）！咦，唔怕，我有佢銀行戶口資料，我估報警啲錢會追得番嘅！
為為：所謂「財到光棍手，一去無回頭」，畀你追得番佢就唔叫「光棍」喇！
婷婷（落淚）：貪嗰啲利息做乜，真係因小失大囉！
為為：唔止，仲有你嗰顆寂寞的心呢！總之，都係嗰句，「光棍佬教仔，便宜莫貪」喺喇！
婷婷（懊悔）：早知佢一開口借錢，我就玩失蹤喇！
為為：咁又唔一定！我之前都有上過呢類網站，識咗個美國工程師，佢都好識「冧」（哄）我㗎！有一日，佢話佢阿媽死咗，十日內要十萬蚊美金做殮葬費，手上得五萬，叫我借五萬畀佢轉一轉。
婷婷：為為，咁你點應付呢單嘢呀？
為為：我同佢講，我睇中批「筍」（質高價亷）貨，但係爭五萬，問佢可唔可以將佢手頭嗰五萬先借畀我，我過幾日還番畀佢，仲借多五萬畀佢㖭！
婷婷：咁有冇借畀你，咁你又有冇借番畀佢吖？
為為：你估佢儍㗎，一問佢借就即刻走頭喇！
婷婷：唉，一早識呢招咪唔使搞出個禍嚟喇！
為為：對付「光棍」，只能夠見招拆招，唔好以為一招可以走天涯；今次係個教訓，以後醒醒定定嘞！話時話，呢招係有「朵」（名堂） 㗎！
婷婷：咁「巴閉」（厲害），乜「朵」呀？
為為：「光棍佬遇着冇皮柴」；即係，一係扮「光棍」、一係扮「窮鬼」，唔會畀你搵到着數嘅！
規範語中，「棍」指無賴、不正派的人。直覺上，「光棍」是一條光禿禿的長木，而那些流氓、地痞等無賴之徒正正予人爛命一條、身無長物的感覺；可能是這樣，「光棍/光棍佬」便被用作此等人的代稱，後此詞泛指騙徒。
「光棍」是來騙財的，你休想從其手中拿回他騙得的財。又當「光棍」騙得財後，你會期望他會留下來給你有個追討的機會嗎？於是有了以下的一個歇後語：
財到光棍手--一去冇回頭
「光棍」深諳討人家便宜之道，所以他會囑咐其子女莫貪便宜，因這會掉下受騙的陷阱；於是有了以下的一個歇後語：
光棍佬教仔--便宜莫貪
「冇皮柴」指沒皮的柴，意味着「光棍」與「冇皮柴」無異。若然出現以下的情況：
光棍遇着冇皮柴
那就是「光棍」遇着「光棍」、「行家」遇着「行家」，可謂勢均力敵--無論任何一方如何「扭計」（出詭計、耍花招）也沒能在另一方身上「攞着數」（撿便宜）。有人用「冇皮柴」來形容連外衣也穿不起的窮人。「光棍」的目的是想行騙，可如遇上的對手是個「冇皮柴」，真個是「騙無可騙」了！另一方面，「冇皮柴」總是希望從任何人身上得到好處，可如遇上的對手是個「光棍」，真個是「欲騙無門」了！
除了「光棍」，日常生活中充斥着各種令人不齒的「棍」，如：「惡棍」（「陀地」，地方上的惡霸）、「神棍」（假神之名招搖撞騙的人）、淫棍（淫褻的人）、「學棍」（名過其實或無真材實學的教育人員）、「政棍」（借從政身份圖私利或意圖達到某些不正確政治目標的人）。
近年，「粵語」已淪為某些「政棍」的政治棋子或某些「學棍」的商業工具。後者，利用港人對「粵語」的情意結，且牢牢的掌握着「不明就是『好』、艱深就是『勁』」的人性弱點，透過網誌編寫、報章撰文、書刊出版、視頻發放、電台開講、電視開騷等手段，把一些不相干的事物或一大堆看似相關實情無關的文獻湊合起來去詮釋「粵語」，此等行為為這類人帶來卓著的聲譽和豐厚的利潤。筆者現把這類人正名為「粵語棍」，因他們只是打着「粵語保育及傳承」的旗號來「搵食」（混飯吃），且手法存在着一定的「棍騙性」。
【專欄簡體版】https://leoleung2016.wordpress.com/