中聯辦主任王志民邀請包括反對派在內的全體立法會議員到中聯辦大樓內春茗團拜，惟反對派中人對這友誼之手毫不領情，更搵盡機會乘機抹黑吓中聯辦。同「議會陣線」議員區諾軒好friend嘅「西環飛躍動力」召集人葉錦龍，就喺fb質疑中聯辦個食堂係「無牌食肆」。不過，有網民隨即打臉，話根據法例，「工作場所內專供受僱於該處的人使用的食堂」係唔需要攞食肆牌嘅，大家千祈唔好跟車太貼咁話。
屈「特權」叫食環署調查
「傘兵」葉錦龍近日喺佢fb以「尋找中聯辦食堂的食物牌照」為題發帖，話自己「想知道這個坐落於西環20年的神秘建築裡面啲食肆有冇牌照」，「但查了一個朝早，無論我用『干諾道西160號』、『德輔道西』、『干諾道西』、『中聯辦』等等的關鍵字，去查找食環署的持牌食肆名單和其他相關列表，都是查無結果。」
他並引用基本法第二十二條第三款，「請問香港政府及中聯辦，相關處所所在的所有食堂、食肆及會提供熟食的宴會廳，有否根據香港特別行政區的《公眾衛生及市政條例》（第一百三十二章）、《食物業規例》（第一百三十二X章）第三十一 （1）（b）條及第三十三C條，以及其他有關法例，申請普通食肆和小食食肆牌照，以及暫准普通食肆和暫准小食食肆牌照？」
佢班friend當然好似執到寶咁興奮。「Ray Mysore」就留言話：「是否應該通知食環署跟進？」「Chiu Kai Wong」則借題發揮：「食環會唔會秉公辦理先？」
專屬食堂免攞牌都唔知
不過，「Ka Sing Lo」就留言打臉：「佢地（哋）當系（係）私人地方！私人㕑（廚）房，私人飯廳，招待私人朋友！不是營商，不用食環的餐館牌照！衣（𠵱）家好多所謂『私房菜』都系（係）咁！」
「鄭家昇」就話：「其實如果成棟嘢係中聯辦嘅，而且只招待中聯辦同埋佢有關嘅訪客嘅，就可以唔駛（使）申請食物業牌照，唔係因為佢哋有特權，而係跟（根）據Cap.132X，全港所有工作場所/學校內嘅食物店（工廠大廈除外，佢哋都要申請牌），只招待有關員工、學生、訪客嘅，都唔駛（使）申請牌做合法經營。切勿跟車太貼。」
葉錦龍就唔忿氣，駁嘴話：「不過商業樓宇明火煮食都係犯法。」鄭家昇就反駁：「唔關事，中聯辦嘅情況，除非開放畀公眾，如果唔係一定當非工廈工作場所計，呢啲地方唔駛（使）牌。正如以前巴士總站內嘅九巴員工飯堂咁，佢哋都係唔駛（使）牌嘅。」
「Leon Lai Cap」更引用相關法例的原文，其中講到明「食物業」一詞不包括任何農業活動、海陸空三軍機構內的食堂、學校內專供該校學生使用的食堂或工作場所內專供受僱於該處的人使用的食堂……」想玩抹黑，都唔該搞清楚先好講嘢啦。■香港文匯報記者 陳川