■聶德權同Vincent遇到有市民暈低，好彩有「任何仁」教急救。任何人都可以係「任何仁」，當然亦都包括政制及內地事務局局長聶德權，同埋民建聯立法會議員鄭泳舜（Vincent）啦。有見近年有馬拉松跑手不適嘅事件出現，局長同Vincent最近一段跑步片，就即席示範咗點樣為不適昏迷嘅人急救，為大家臨開跑之前加多少少安全知識。
局長同Vincent日前相約練跑，為周日「渣打馬拉松2019」做最後準備，最新一條短片，講述兩人跑步期間遇到一個市民突然暈低，好彩有「任何仁」現身，教局長同Vincent進行急救。
局長喺段片度都交足戲，跟住「仁何仁」嘅口訣「左手、右手、直手擺喺心口」，用心外壓為昏迷者急救，段片仲教埋大家點用AED機，電擊昏迷者時仲要記得舉高雙手保護返自己。
由於只係模擬片段，片中嘅「昏迷者」當然醒返，「任何仁」仲鼓勵大家話︰「個個人都可以係『任何仁』，你哋跑馬拉松都得，CPR（心外壓）一定難唔到你哋啦！」 ■香港文匯報記者 鄭治祖