反對派將所有事都政治化，故意挑起爭拗，搞到社會上意見不同者經常吵吵鬧鬧。噚日係一年一度嘅情人節，無論有冇另一半，輕鬆一下都無妨嘅。政界中人噚日就紛紛喺fb發帖慶祝情人節。民建聯3位小花更專登拍短片，演繹大家理想中嘅女朋友，係會喺情人節同你一齊食車仔麵，仲會買定禮物畀你。不過，民記都提醒，大家睇完片FF（幻想）吓就好啦，感情係需要雙方付出嘅，唔好旨意要女仔就晒你呀。 ■香港文匯報記者 陳川
民建聯噚日喺fb上載咗由3小花──包括屯門社區主任賴嘉汶、葵青支部社區主任鄧麗玲，同東區區議員植潔鈴深情演繹「情人節快樂：你想的女朋友」短片。片中，賴嘉汶嘅「男友」食飯冇訂位，佢就笑笑口同對方食車仔麵；鄧麗玲就同「男友」睇戲但對方遲到，好彩佢特登約早啲先睇得成戲；植潔鈴更主動買定禮物畀「男友」。
民建聯fb嘅帖文話：「如果你想試下（吓）情人節唔訂位、遲到或者兩手空空？除非你想變成『單身久』，否則我哋勸你都係睇完條片再FF兩分鐘好啦......祝大家情人節快樂！」
情人節，好多花店都開天價，民建聯新界西立法會議員梁志祥就教大家送士多啤梨玫瑰花，「睇得又食得。」九龍西議員陳凱欣就拍片教大家用利是封摺玫瑰花。
柯創盛陪太太不忘工作
民建聯九龍東議員柯創盛就以一篇《一段25年的初心與堅守》嚟訴心聲：「作為工作狂的柯仔，（昨）晚上也暫且放下工作， 和我家CEO（太太）吃飯慶祝拍拖18年兼結婚7週（周）年，之後再去文化中心看花燈，以及剛剛開放的星光大道巡視（始終不忘工作），享受一下拍拖的浪漫感覺。輕鬆了大約三小時後，再同CEO回地區，一起參與互委會的團拜活動。
他笑說：「近年很多人都說服務社區要不忘初心，其實愛情同樣要不忘初心，只要牢記當初的感覺與承諾，又點會怕七年之癢？」佢仲標註咗「男人背後的賢妻」、「只願一生愛一人」、「就算日子不好過，都有妳撐我」，又透露「我想下年同埋我們的寶貝一齊慶祝」、「這是我的願望也是堅持。」
民建聯中西區支部幾個社區主任，包括施永泰、莫淦森、張嘉恩、劉天正，就喺情人節模仿韓國綜藝節目Running Man，搞咗個「溫馨Man大挑戰」，教路：「要喺佳節前夕擺脫單身，不妨好似阿泰同阿森，做足準備熱好身，鼓起勇氣去贏取女神嘅芳心！」
陸頌雄：咪學「毒男」團
工聯會議員陸頌雄就喺fb分享咗唔少今年情人節嘅趣聞，包括日本「毒男」團體趁住情人節示威，話情人節係「朱古力廠商嘅陰謀」，要「粉碎情人節」！「不過有人就潑冷水話：佢哋就係因為咁，先拍唔到拖囉......」
九龍東議員謝偉俊與「才女」白韻琹相戀30載，佢趁昨日喺fb放閃：「無論外界對我與白姐姐關係有幾多評論同揣測，我地（哋）已經攜手近30載，一切盡在不言中。夫妻相處之道，在於互相支持、鼓勵，包容及珍惜對方。感謝沿途一直支持我地（哋）嘅您，祝大家生活甜甜蜜蜜，有情人終成眷屬。」
建築、測量及都市規劃界議員謝偉銓，就親手整手工玫瑰花畀太太，仲係帖文話：「感激佢願意與我攜手一生」，相信謝太一定冧到爆啦。