梁振輝 香港資深出版人
圖中上演了一幕「全港扮嘢大賽」。有參賽者「扮魚」，有參賽者「扮蟹」......最終由「扮晒魚蝦蟹」的一組摘下桂冠。
廣東人很喜歡說人「扮嘢」、「扮晒嘢」。「扮」指裝，喻以假示人；「晒」含全面的意思；「嘢」指東西，可引申樣子。「扮嘢」就是裝樣子，而「扮晒嘢」就是極盡「扮嘢」之能事。通過在社會上不斷的演化，這兩個口頭禪的含意已變得多樣，且看以下的示例：
示例1：
你咪「扮嘢」呀，一早知竟然話唔知！
「扮嘢」指「詐唔知」（佯作不知）。
示例2：
明明一早知話唔知，「扮晒嘢」！
「扮晒嘢」是對某人裝不知的行為表示不滿的反應語。
示例3：
佢真係好識「扮嘢」㗎！老細日日準時九點鐘返工，佢就早老細幾分鐘返嚟；仲有老細唔走唔放工！
「扮嘢」指裝模作樣。
示例4：
係人係鬼都知道佢講緊大話喇，啲「扮嘢」技巧都好差啫！
「扮嘢」指弄虛作假。
示例5：
我次次話同佢傾正經嘢，佢都喺度「扮嘢」，分明係唔肯面對問題啫！
「扮嘢」指「詐傻扮懵」（裝瘋賣傻）。
示例6：
我至憎嗰啲有錢佬，捐得嗰十零廿萬就走出嚟「扮晒嘢」，講到自己幾咁大仁大義、大慈大悲！
「扮晒嘢」指裝清高。
示例7：
A：把口就話，「仔死仔還在」（舊的男朋友走了，新的男朋友就會出現；多用以自我安慰）！
B：「扮晒嘢」啫，上次佢「畀仔飛」（被男朋友拋棄）嗰陣都係咁講，之後咪「嗌生嗌死」（呼生喚死）囉！
「扮晒嘢」指裝不在乎。
示例8：
A：佢最近見嚫人就話中咗六合彩，我估係「扮嘢」！
B：我都係咁話，因為佢平時講親都冇句真！
「扮嘢」指煞有介事（真有這麼一回事似的）。
示例9：
A：講到「扮嘢」囉喎，而家嗰「脫人」（輩人），「邊係嗰皮」（達不到那個水平）呀！
B：我認為最出色嘅梗係盧海鵬喇，當年佢著住條波波裙扮徐小鳳，連「小鳳姐」都話頂呱呱！
C：我就話鄭少秋出色啲！當年「秋官」扮澤田研二同米高積遜（Michael Jackson），可謂經典中嘅經典，之後咪係人都叫佢做「扮嘢秋」囉！
「扮嘢」指把名人的模樣裝扮得維肖維妙。
如果你問身邊的八九十後，「扮蟹」是什麼意思，他們多會第一時間告訴你，「扮蟹」就相當於「扮嘢」。沒錯，經過龐大的使用率，某個詞被賦予一些新的意思是可以的，但絕不可蓋過原有的意思。「扮蟹」的語源如下：
為防蟹鉗人，賣蟹的人會用鹹水草或繩子把蟹綁至動彈不得。舊時賊人入屋行竊，如遇上有人在屋內，多會先行用繩子把事主捆綁，一如「綁蟹」般，再進行搜掠。
有人就用「扮蟹」來形容被綁的事主。香港經典漫畫系列「老夫子」就不時出現了「扮蟹」的情節。
對於「扮蟹」那個新意思，坊間流傳如下：
由於蟹是橫行的，所以予人橫行霸道的感覺。「扮蟹」便用以形容「吔文吔武」（「吔」讀「也3-4」）、「認屎認屁」、「無料充代表」（耀武揚威、吹噓成性），玩突出兼做作之流，意思接近「扮嘢」。
筆者認為由「橫行」引申至「扮嘢」的路徑頗遠，這只是人們根據「直觀性」作詮釋罷了。嚴格來說，這個新意思是個誤解。
「魚蝦蟹」是一種中國傳統的賭博遊戲，其形式與賠率與另一賭博方法「骰寶」基本相同，不過所採用的骰子用上「魚」、「蝦」、「蟹」、「金錢」、「葫蘆」和「雞」的六款圖案來代替點數。雖然這個玩意現今已不流行，但是「魚蝦蟹」這個海鮮組合卻深入民心。由於多人誤以為「扮蟹」相當於「扮嘢」，所以有人就想：「如果把『魚』和『蝦』也結合其中，不是『更扮嘢』嗎？」，於是乎就有了「扮晒魚蝦蟹」的講法，後來這就被視為「扮嘢」的加強版了。