■鍾翰林轉發一個「提醒」不要「被政黨騎劫」的帖子，明顯是針對「眾志」。 IG截圖傳統反對派政黨為一己政治利益，挑動群眾阻撓《逃犯條例》的修訂，更將政治滲入校園，「港獨」分子亦想趁機分一杯羹。「學生動源」近日就試圖入侵校園，並計劃參加「民陣」稍後舉行的反修例遊行。
可能自知支持度不足，「學動」召集人鍾翰林就想黐「香港眾志」金糠，提出要和對方一起搞中學生遊行，結果慘食檸檬。鍾翰林就抱怨有人「搞分化」。
鍾翰林昨日在fb連發多帖。他在首帖文中「問」：「如果有兩個中學生團體分開喺69遊行集結學生一齊行，大家認為兩邊應唔應該合作喺同一個集合點然後一齊行？」
「Ken Ben Bill」就認真答：「覺得分開行宣揚作用會更大！類似兩個街站好過一個街站一樣，分頭行事。」
鍾翰林即時回應稱：「始終唔係話會太多學生咁你啲中學生仲要分開行？......街站人數唔使多，但係你遊行人唔夠多仲要分散根本無人知你哋學生係有成班走出嚟。」
「Wing Chung Fu」亦係衰認真：「唔好分開行，有咩事幫手照應。」鍾翰林就發晦氣爆粗：「人哋背後有大黨滲透洗（使）×同你行咩！」
何出此言？原來「眾志」聯絡了多個所謂「由校友、教師、學生」發起的「反修例聯署組織」，搵學生參加「民陣」6月9日搞嘅反修例遊行。鍾翰林就同「眾志」講數「一齊行」，但係失敗，所以就發爛渣。
佢其後發帖再寸「眾志」：「某人：對面動×『港獨』底，所以為咗學生安全我會叫學生跟我行；我：對面眾×『自決』底，所以為咗學生安全我會叫學生跟我行！」
之後，鍾翰林再發帖，針對「眾志」話佢哋想利用學生去達到自己的「政治目的」，「呼籲」學生不要「上當」：「切勿被利用，六月九日聯合中學生集合遊行！『學生動源』將提供一切支援。」
發帖鬧「眾志」搞分化
「謝文西」就頂唔順，留言道：「 學生想跟邊個咪跟邊個，有得逼（迫）咩？」鍾翰林就話：「冇得逼（迫），只係有人分化啫！」後來，他還轉發一「關注組」的帖子，「提醒」不要「被政黨騎劫」。
其實，大家都係想騎劫學生，不用分得那麼細啦，又何必狗咬狗骨硬係要出醜人前呢？■香港文匯報記者 陳川