■疑似「雪糕華」話「手足」冇交工卡，網民指言論老屈。 fb截圖「黃店」成日話要通過請「手足」來「支援」他們的生活，但其實咪又係當佢哋係condom！專門狙擊「龍門冰室」嘅群組近日發帖，指控龍門老闆「饅頭張」（張俊傑）拖兩個預告會執笠嘅「手足」9月嗰份糧。「饅頭張」就賴係政府遲遲未發放「保就業」津貼所以至咁樣喎。見俾人喺網上鬧，當初被「饅頭張」話有份參與開店嗰幾個「黃人」見狀即推諉話完全唔關自己事，有人仲要話係「手足」遲交工卡先導致咁嘅結果喎。
專狙擊「龍門」嘅facebook群組「倫敦人西先生手記」日前有人發帖，指控「饅頭張」拖欠旗下員工9月份嘅工資，包括炮台山嘅Lennon Cafe全店喺月頭都未收到人工，已預告會執笠嘅紅磡龍門更加因為員工被拖糧，所以成班廚房日前拉隊走人而要提早執笠喎。
賴「保就業」未發放周轉唔嚟
據網上流傳話係龍門畀有關員工嘅通告：「由於保就業第二期遲遲未發放，政府100%擔保嘅銀行貸款又未到戶，龍門現時周轉唔嚟，要多一兩日先俾（畀）到票大家，非常抱歉」喎。其後，有員工話終於收到錢嘞，但就唔係現金支票，所以要拖多幾日先轉到數。
被指拖糧嘅呢間Lennon Cafe，係「饅頭張」之前公開話由攬炒派「才女」、經營網購食品O'chef lab嘅梁芷珊，同「黃店」Sogno Gelato老闆「雪糕華」鍾耀華幫佢「協助管理」嘅。今次發生拖糧事件，佢兩個人有咩講法？有人去梁芷珊嘅fb留言挑機，但梁芷珊就聲稱自己喺Lennon Cafe間舖「既無投資，亦不是股東」，話自己只係「食物供應商」，只「管理食物，交貨」，所以拖糧一事同自己無關。
曾被「饅頭張」爆料會從間舖每月攞盈利25%入袋嘅「雪糕華」，見狀都要「戴頭盔」。網傳一個疑似「雪糕華」4分鐘嘅錄音，佢話係因為班「手足」冇交返工卡，先計唔到數，而交咗「饅頭張」佢哋計數都要時間。
至於嗰25%營利收益，錄音中就顯示佢話已經「全部畀咗」班「手足」，自己只係「借名」、「未收過錢」，所以估唔到拖糧都要燒到佢。喺音頻裏，佢仲粗口疊粗口，唔知問候緊邊位搞到佢咁嬲嘅人。
網民「Sun Leu」就寸爆「雪糕華」：「執咗笠先至嚟話本身諗住啲利潤係分比（畀）年青（輕）人嘅？......雪糕華開口埋口話自己一毫子都冇收過，梗係啦，由試業到蝕本收皮只有短短一個月，冇利潤的話佢邊度有錢收呀？」
「Belinda Nixon」話：「咩（乜）姐（啫）依（??）家，掛個名出黎（嚟）有錢賺就笑騎騎，有事果（嗰）陣又唔想上身，『饅頭張』搵得你唔係覺得有好處益你咁著（着）數呀嘛？」
網民狠批一丘之貉
「Ricky Ho」就覺「『財（才）女』就（做）食物管理人，『雪糕華』就（做）名稱（聲）管理人，真係好×好笑喎。」「Jojo Liu」就狠批佢哋係「一丘之貉」，「Der HL」直情話係「黃色騙局」喎。 ■香港文匯報記者 文根茂