英國政府早前宣稱會動用4,300萬英鎊支援BNO計劃，「大義凜然」咁話要幫助一班居英港人。消息一出，唔少香港人興奮到不得了，仲即刻痛哭流涕多謝英國對佢哋嘅大恩大惠。不過，有心水清嘅網民就質疑英國咁做其實別有用心，根本係想借機將香港人擺上枱，加速「BNO Visa」滅亡。
fb專頁「港英飛機車大砲」日前就發文指，唔少英國人喺過去一年面對收入大減、失業嘅問題，代入英國人角度睇，見到有成4,300萬英鎊拎咗去處理移民問題，大部分人自然會嬲啦，有唔少英國人更加喺twitter度投訴，政府連自己人都未照顧到，點解仲要分資源畀「外人」呢？
幫真英人就業 吸水魚燒存款
「港英飛機車大砲」就覺得，英國政府高調做公關幫香港人，一方面門檻之低提供所謂支援安撫班工黨「左膠」，國內可以創造職位請自己人；另一方面贏晒民主掌聲，比較起處理疫情用咗接近4,000億英鎊，呢4,300萬英鎊嘅錢簡直小巫見大巫，但係光環效果極大。
唔單止咁，佢仲陰謀論咁指「（英國）計過數香港人會帶來幾多經濟效益」，你以為真係咁容易就批准永久居留？事實上五年內頂唔住嗰班就自動回流，當局甚至會放任班人走法律罅，例如唔報足稅嗰啲犯法嘢，到佢哋申請永久居民時就查家宅，有問題就拒絕申請。
「港英飛機車大砲」仲揶揄：「政治學只得幼稚園程度嘅香港人唔明，英國政府愈大聲幫香港人，其實就可能係害緊你加速BNO visa滅亡。香港人有無覺得被擺上枱？無嘅，畫面靚。」
唔少網民都表示認同。「Ka Hei Li」回應話：「香港人有錢有學識，為何要批一大堆錢攪（搞）支援呢。今次真係畫面好靚，之後就大×鑊。」「Cheer Ko」就話：「好多福地人俾『泛民』班友縱慣唔用腦，點會諗到咁深入喎！深層政府老祖宗，緊（梗）係計到條數可以回本兼賺突（凸），而且仲有掌聲光環。」「Isabella Wong」就恥笑：「 善良嘅香港人只會仲喺美麗又奇妙嘅童話世界入面。」
●香港文匯報記者 倪思言