民主黨（白鴿黨）呢幾日好忙，忙乜﹖咪忙住喺多區籌款囉！不過，眼見啲街站就無乜人理，仲被人發現佢哋籌完款後，拎住唔多又唔算少嘅款項去手足個個要抵制嘅中銀入數。事件被曝光後，白鴿黨啲人仲想反咬，諗住煽動啲人針對「爆料」嘅建制派，但唔少網民都算公道嘅，個個講重點追住問佢哋點解仲用中銀？
攬炒派成日為咗一己政治利益搞撕裂，叫人杯葛中資企業，𠵱家俾人「情緒勒索」返係必然嘅事。白鴿黨元朗區區議員林廷衞日前被活捉喺街頭賣咗啲籌款獎券後，轉頭將啲錢存喺中銀。雖然當時俾問到口啞啞，但轉頭就喺facebook發帖公審個爆佢出嚟嘅人係民建聯元朗支部委員社區幹事李啟立，仲要利申自己無「個人中銀戶口」，諗住轉移視線。
不過咁係冇用嘅，啲網民都好識捉得住重點。「Agnes AY」質問：「咁我想問點解你仲會用中銀？我一早cut咗。」「Peter Chan」就話：「仲用中銀，玩乜×，知唔（知）爆中銀玻璃啲手足捱緊橙。」
「Cheung Vin」就覺得：「民主黨一向都係建制B隊，但失左（咗）控咋嘛。所以用開中銀都好正常。」
「N.T. 監察聯盟」就發帖(右圖)話，「有市民發現元朗泛暴區議會主席在元朗繁華鬧市擺街站呃糧支，但在鬧市人來人往的情況下，黃偉賢眼前的籌款箱卻空空如也，連黃偉賢都提不起精神只能失落仰望著（着）籌款箱。」「聯盟」又揶揄：「手足：支持你哋咪等於支持中銀？我唔想啲糧支被凍結。」睇嚟做事立場成日曖曖昧昧嘅白鴿黨，跟住嘅路都幾難行喎。 ●香港文匯報記者 文根茂