●有網民近日喺連登討論區上，鼓動市民於本周六(12日)到銅鑼灣「如水再聚」，公然煽暴。 「連登」截圖黑暴分子兩年前借修例風波搞到社會立立亂，雖然香港國安法實施後，大部分黑暴已經受到法律制裁，但總有一小部分（黑暴）依然死心不息，定時定候又再鼓吹「手足」上街，妄想可以重現當時嘅亂象。唔單只有人喺連登鼓吹，「港獨」組織「賢學思政」噚日都大肆煽動市民，本周六去旺角「再聚」。
「港獨」組織「賢學思政」噚日喺社交平台facebook發文，聲言「身土不二，烽煙再起」，6月12日會喺旺角繕饈腹A但就宣稱唔會公布詳細地點。佢哋宣稱：「大家可以周圍搵我哋......幾時嚟都得......」仲揚言希望大家去旺角呢個「充滿血汗和『勇氣』的地方『如水再聚』」。
「驚×咩？」日前都喺連登開post，聲稱會喺6月12號夜晚7點鐘，喺銅鑼灣街頭舉行所謂嘅「6．12 香港人 如水再聚」活動。佢就煽動一班「手足」話：「當全球在6月12日『聲援』香港嘅同時，我地（哋）就正正企係（喺）呢一片土地上，點解都唔行出尼（嚟），證明比（畀）全世界睇，香港人仍然堅持緊。」唔單只不斷鼓吹人上街，佢仲聲言：「當大家係（喺）同一個街頭，大家自然會知道要做咩。」
不過，「手足」嘅反應就麻麻，唔少人都覺得佢哋想叫人出去送頭、俾警察拉。「小林尊絲」就爆晒粗口咁講：「嘥×氣啦，又搵人出黎（嚟）送頭？」「好鍾意返工」就批評：「又玩情緒勒索。」
「掀起你的蓋頭來」就勸佢話：「唔好搞啦，陣間又塞車，星期六約咗人食飯......你地（哋）除咗影響他人正常生活就冇其他作為。」
其實過去兩年，久唔久就有啲黑暴分子會喺網上鼓吹人上街集結，但實質就「叫人衝自己鬆」，搞到班「手足」都已經唔再相信，反問返：「Be water （如水）意思係咪水人？」
警擬逾千警力應對
有傳媒昨晚引述消息透露，因應網上有人號召於本周六發起非法集結，警方經初步評估後，已擬定部署過千警力應對，但實際警力會視乎情況作出調整，各總區應變大隊將有部分人員要隨時候命，防止有人乘機搞事。 ●香港文匯報記者 倪思言
