●黃店沙田「榮樂茶餐廳」涉嫌虐貓。 連登截圖萬物有靈，動物嘅生命都值得去重視及珍惜。但黃店真係大晒㗎，竟然可以公然虐貓，仲要係屢教不改嗰種，真係睇到人㷫合合。近日，有人喺網上披露沙田黃店「榮樂茶餐廳」嘅兩次虐貓事件，頭一次係用貓繩將貓長期綁喺門外，之後愛協上門後隻貓仲「失蹤」埋。但係佢哋近排又養咗一隻貓，但就被爆好似貓咪被打斷手。「榮樂」老闆仲要不斷狡辯，更爆晒粗地鬧返其他關心貓貓嘅人士，真係冇陰功囉。
好耐之前已經有人發現「榮樂」虐貓。當時佢哋舖頭有一隻貓叫「旺旺」，俾人長期用貓繩綁喺門外，從相關圖片可見現場環境非常惡劣，目測貓貓走動嘅空間好窄，而且食物兜入面大多係廚餘和魚骨，食水兜也十分污糟。
面對有好心人提醒老闆「旺旺」眼發炎同好瘦削，勸告帶佢睇醫生或請他人領養，「榮樂」只係重複話「旺旺」實際活動範圍好大，有定時餵罐頭同糧食云云，但就冇提到要去睇醫生，而「榮樂」太子女亦只係不斷強調自己「控制唔到」，唔關佢事云云。當有好心人表示想領養「旺旺」，老闆就話無所謂，點知對照顧貓咪唔上心嘅太子女卻出嚟阻止。
後來，有人睇唔過眼通知愛護動物協會，但愛協到場後老闆只係用粗口鬧職員話點養貓關佢乜事。有人仲話老闆之後將「旺旺」帶去其他地方，扮唔見咗隻貓，真係令人懷疑「旺旺」係「被失蹤」。最後到今時今日，愛協無辦法救走隻貓，亦都冇人再見到「旺旺」，唔知佢最後嘅下場係點。
經過「旺旺」一事後，「榮樂」仍然死不悔改，養嘅另一隻貓「小白」亦疑似遭虐待。
據說，有人見到「小白」瘦到皮包骨，而且對眼發炎，身上亦多處有傷口，嘴角更有血跡，最近更好似俾老闆打斷手，可惜佢哋根本無諗過要醫好佢，令「小白」大部分時間都係合埋眼，連開眼都好困難，更離譜係老闆辯稱話有畀「小白」塗藥膏，當醫咗，真係惡毒到呢。
網民：「黃就可以虐待動物？」
面對「榮樂」呢種虐貓行為，好多網民激到火都嚟。「renlancer」話：「睇完個post，太子女仲要係（喺）貓group扮有愛心，成家都偽善到××。」「?銀」斥：「其實對隻貓好少少係咪咁難，仲要做生意唔會窮得去邊，一而再有呢啲虐貓消息，唔係仲唔改善下（吓）話？」「惹火尤物菜」表示：「又多間店俾人踢出黃色聖人圈。」「玻璃小粉紅」就批評：「黃就可以虐待動物？」
●香港文匯報記者 郭家好