|
顧信之
2012年立會新增的5個「超級區議員」議席的選舉安排，開始成為社會討論的焦點，各大政黨均傾向以全港1個大選區的模式，按比例代表制選出該5個新議席，意味每名當選者的選民基礎平均有60多萬人，所得選票幾可肯定多過經由5區分別選出的地區直選議員，可謂「民意授權爆晒燈」，故許多「政治明星」均躍躍欲試。有政壇老友對信之說，08年敗走新界東的自由黨前主席田北俊，近日向多名身邊朋友透露，自己有意「再戰江湖」，與弟弟田北辰一起出戰明年的區議會選舉，先取競逐「超級區議員」議席的「入場券」。
心儀「超級區議員」 先取入場券
「改良區議會方案」未有具體安排，各路人馬已經磨拳擦掌，「冇位」的白鴿黨單仲楷、狄志遠，「有位」的公文袋大口湯和匯賢智庫主席葉劉淑儀等星級人馬，均事先張揚有意要當2012年的「超級區議員」。政壇老友說，休整兩年的田大少，原來也有意「玩埋一份」，「呢個消息，我唔係學癲狗幫『客觀事實加主觀判斷』亂咁噏，而係有朋友話，大少親口同佢講要玩區選，加埋大少佢最近動作多多，所以我先敢講。」
老友說，田大少最近公開話想搞一個改善商界形象的億元基金，說是因為在政改方案的種種爭拗中，商界備受針對和攻擊，所以想出來搞這個基金。老友坦言，這個構思在商界醞釀已久，並非田大少首先提出，但要組織起來實在不易，資金來源已是一大問題，還有要找一個「食腦」又勁到可以扭轉香港多數媒體動輒污衊商界的歪風的人才，就更加難，「當然，如果田大少真係搞得成，對商界來說都係一件好事，我祝佢好運啦」。
趁戲子陳民望急跌 欲取回山頂區
「億元洗底基金」只是前奏，老友說，「超級區議員」席位才是大少的主菜：「大少再落政壇，真正關鍵係2012年選『超級區議員』個位，佢當然係想攞咗入場資格先，到時再考慮係咪真係落場選囉，況且現在霸咗山頂區的戲子陳民望急跌，正係打落水狗的好時機！」
老友坦言，大少要「借道」，「重返山頂」是最實際的考慮，因為他本來就是山頂選區的區議員，而區內班選民本身都好有「食力」，少有事情一定要麻煩區議員，大少當選，都用不著像其他區的區議員幫人通坑渠掃垃圾啦，所以參選立會時才將這個議席「過戶」給林文傑，不想給公文袋的戲子陳搞亂檔，大少當然想收復失地啦。
同時，選山頂區打戲子陳呢條落水狗，難度始終比較低：「戲子陳當選山頂區議員之後，冇建樹都算啦，仲忽然群埋癲狗幫度搞激，在所謂『公投』期間好似標童咁叫埋啲咩『起義』、『解放香港』等激進口號，仲投入過癲狗幫3丑，令好多藍血選民，尤其係山頂區班大哥大姐好失望、好不滿，大嘆所託非人，唔少人都諗住出年區會選舉就拉佢落馬！」
缺地區網絡「樁腳」 自由黨有隱憂
不過，老友嘆言，大少以至二少要「借道爭位」也不容易，皆因自由黨的地區網絡、「樁腳」及直選吸票能力不足等老問題未解決，以08年立法會選舉為例，自由黨在5大選區的總得票只得6.5萬，但一個「超級區議員」預計需要約20萬張選民票，就算順利選返做區議員，無其他地區網絡始終會好難爭，二少最近接受傳媒訪問時也提出這一點：「佢哋要在短短2年內開拓出約13萬票差額，雖未至於係不可能的任務，但肯定唔係一件易事」。
另一個暗湧是抱同樣心態的挑戰者不會少，居於山頂的葉劉已張揚，「有需要的情況下」自己會考慮明年參選山頂區，稍後還可能會有其他挑機者「唔聲唔聲嚇你一驚」，「一個唔好彩俾戲子陳執死雞就大劑啦」。
|
