■民主黨竟然借有黨員被判罪來抽水宣傳，果然係反對派「第一大黨」。 fb截圖香港文匯報訊（記者 羅旦）一個政黨知道有黨員被法院判罪後會做啲咩？民主黨就示範畀你睇──抽水囉！民主黨成員張啟昕因在旺角「佔領區」清場時違反法庭禁制令，前日被判刑事藐視法庭罪成，民主黨驚死人唔知，喺fb登佢大大張相出嚟，話「公民抗命、無畏無懼」喎。不少網民鬧爆民主黨冇個大佬出事，擺明煽人違法自己攞光環，實在無恥。
前日明明就有9個人被高等法院判刑事藐視法庭罪成，但民主黨梗係宣傳自己行先啦，所以喺fb將張啟昕張相登到大一大，第一段就講明佢係民主黨成員呀，然後先將其餘19個此前認罪及前日被判罪成者嘅名單，包括「風頭躉」黃之鋒、岑敖暉等等列喺帖子下面。
人哋可能要坐監，你仲嚟抽水？網民就睇唔過眼，「Biu Cheung」揶揄道：「佢有今日，要多謝（民主）黨！」「Eagle Tan」就批評：「不斷鼓動人犯法，美化違法者，究竟對社會有何好處？」「Karina Cheung」就說：「連自己仔女都唔認同或者禁止參與。就去鼓吹人地（哋）仔女去死！」
網民也紛紛恥笑所謂「無畏無懼」其實只係得把口。「Chan Lam Lo」笑道：「無懼無畏咪去坐監囉！」「Leung Kwok Yiu」就揶揄：「咁無畏無懼，點解又話政治打壓，又唔肯認罪呢。」「Drwan Wan」恥笑道：「因為......驚囉！亂吠牠們就叻啫，真係要坐監喎，仲（唔）嚇到瀨尿咩，梗要作D（啲）藉口為自己解說喇！」
疑為民主黨支持者「董紹興」就留言稱：「呢個民主黨員，算係民主黨內的社運派，要好好真（珍）惜，買少見少！」「Chung Cheung」秒殺道：「係！的確買少見少，因為之後嘅年輕人越來越醒，知道祈福黨存在，再冇咁容易被飯民（泛民）推落火坑！」
網民鬧「年輕人作犧牲品」
「Edmund Chan」就慨嘆道：「無畏無懼又唔見你哋叫自己仔女出去抗爭？呢班無腦嘅年輕人咪比（俾）你哋作為政治犧牲品，增加你哋政治本錢......」
