■有「熱狗」寸朱寶生嫌黃毓民個名臭，寧用前「熱狗」名義撐袁。fb圖片就算無政治智慧，都應該勤啲做末牷A咁就唔會出醜人前啦，但事實好多從政者就連功課都懶做。好似有意參選立法會九龍西補選嘅民主黨袁海文，近日就喺fb上載一段以狂迷台灣「雞扒妹」鄭家純響朵、前「熱狗」朱寶生支持佢參選嘅短片，試圖證明佢「大愛無私」，以吸激進派的選票。不過，「熱狗」就狠批朱寶生曾經「篤灰」，搞到另一前「熱狗」坐監，已經得罪晒所有「熱狗」甚至已經同「熱狗」反咗面嘅人，仲揶揄此舉反映袁海文真係蠢到痹，完全冇政治智慧。
袁海文前日巧威威咁上載一段短片，片中話朱寶生撐佢參選，仲慌死人唔知，字幕寫明佢係前「熱狗」，仲要喺帖度標註埋「前熱血公民成員」幾個字。片中，朱寶生話自己中過「美容陷阱」，求助無門，好彩袁海文無因為佢嘅政治取態而唔幫佢咁話。
自詡支持者跨政治光譜
袁海文自己仲喺帖中老王賣瓜，話自己處理咗接近400宗涉及「美容陷阱」個案，其中有啲係來自不同派別嘅人，「呢點（黨派不同）絕對唔會係我嘅考慮因素，因為無論你係來自任何政治光譜，只要你嚟搵我求助就係代表對我嘅信任，我一定會傾盡全力替你取回公道！」
你用前「熱狗」嚟介紹朱寶生，有冇諗過「熱狗」感受？冇，因為你只係諗你自己！「熱狗」主席蟲泰（鄭松泰）就發帖，話朱寶生當年接受傳媒訪問時「唱衰熱狗」，話自己前年8月因涉嫌在選舉論壇中襲擊警務人員而被起訴，但「熱狗」冇支援過佢，又指朱寶生為求自保，當時向警方篤灰，指證同案另一人、時為「熱狗」的李政熙。
蟲泰：影響閣下自理
蟲泰繼續講：「本人認為朱寶生出賣同道人的行為，徹底違反道德，除其人格破產外，更傷害抗爭運動，於是斷絕一切協助......朱寶生其人的下場如何，本人並不關心。此帖旨在向民主黨的候選人說明，若閣下樂意尋找朱的個人支持，其影響閣下自理；但閣下處理朱的『支持』而涉及本黨牌頭，本黨則難免介入是次九西補選。因此，請不要提及本黨牌頭。」
唔少「熱狗」就恥笑袁海文竟然搵一個「熱狗」唔妥嘅前「熱狗」嚟宣傳自己嘅「大愛」，最終只會適得其反，更反映咗袁海文實在冇咩政治智慧囉！「信人子」就話：「先不論『朱寶生』其人曰何，但堂堂『香港『泛民主派』第一大黨』，居然要用一個『在其黨心目中『聲名狼藉』之組織前成員』為其參選人背書，老夫亦不禁啞然失笑......『香港民主黨』，『香港人』，爾等值得擁有。」
「藍鳳凰」就乘機揶揄一下「狗主」黃毓民：「黃毓民教徒朱寶生當日上壹傳媒唱「熱血」唔幫抗爭者，之後黃毓民多次借幫佢出頭（為名），去鬧「熱血」唔幫抗爭者，節目又多次讚揚佢係義士......諷刺嘅係，今日民主黨司庫袁海文用朱寶生出宣傳片，片入面佢個朵唔係『普羅政治學苑支持者』或者『黃毓民支持者』，而係拎住『前熱血公民成員』呢個朵招搖撞騙。亦即係話，即使黃毓民又義士又攬頭攬頸巴結，響（嚮）即使投機如朱寶生咁嘅人心入面，都覺得只要諗起黃毓民，形象太負面，太趕客唔入屋。」
你民主黨以為執到寶，結果引嚟嘅係關公災難，睇嚟袁海文應該檢討吓嘞！
■香港文匯報記者 羅旦