■有網民製圖恥笑《明報》斷章取義，並提醒各位勿「跟車太貼」。 fb截圖民建聯立法會議員陳恒鑌（阿Ben）日前接受傳媒訪問時表示，如果藥企對香港係供應穩定，佢個人對內地客人到香港打疫苗持開放態度。不過，《明報》日前就簡化再簡化，唔知有意定無意咁忽略咗「如果香港供應穩定」嘅大前提，就咁話陳恒鑌歡迎內地人嚟香港打疫苗，一眾反對派中人即企出嚟唱衰對家。結果陳恒鑌即時攞證據出嚟澄清後，《明報》改返條題扮冇事發生，一班反對派就炒晒車，結果咪俾網民「留底」加恥笑囉。
內地對香港疫苗有一定需求，阿Ben日前接受《環球時報》訪問時，主要回應「內地人來港搶疫苗致疫苗供應緊張」呢個謠言，表示香港疫苗供應的問題主要視乎藥廠嘅供應，仲指出香港疫苗的斷貨壓力一直都存在，所以香港的公立機構會首先保證服務本地市民。
他其後提到，如果喺藥企保持香港市場供應穩定嘅情況下，佢對內地客來港打疫苗持歡迎態度，又認為這對香港旅遊經濟有益。
訪問斷章取義 屈撐盲搶疫苗
呢番說話其實都幾合情合理，但《明報》就當阿Ben講嘅大前提冇到，斷章取義，喺前日報道中用斗大加搶眼嘅標題稱「陳恒鑌歡迎內地人來香港打疫苗」，令唔少讀者以為即使香港唔夠疫苗，但陳恒鑌仍然歡迎內地人嚟香港打疫苗喎。
一班反對派即刻出晒嚟唱衰加抹黑，鴿黨前日就喺facebook出文「指責」陳恒鑌明目張膽「出賣」香港市民利益，話佢「唔放香港家長同小朋友在眼內」喎。
面對多方嘅無理攻擊，加上反對派推波助瀾，以訛傳訛越來越厲害，阿Ben當然即時喺fb直播澄清事件，拎返原文出嚟反駁《明報》。
恒鑌fb澄清 《明報》鬼祟改題
佢指《明報》有關嘅報道失實，而其他傳媒就相繼引述有偏頗嘅報道，對佢十分唔公平。佢重申，佢喺《環時》上係為香港市民發聲，希望呼籲傳媒報道時，要睇清楚《環時》原文，唔好再喺標題上斷章取義，並把持住公平報道的原則。
澄清一出，發覺原來成班反對派都「跟車太貼炒晒車」。《明報》梗係知衰即「跪低」，當晚即時修改報道標題同圖片，加返「如藥企保持香港供貨穩定」嘅前設字眼，諗住改咗當無數喎。
網民寸偏頗程度堪比《蘋果》
但報道出咗街就係出咗街，梗係難逃一眾網友cap圖加追擊啦！「林婉濱」批評《明報》嘅公信力已大不如前：「《明報》早幾年已自除公信第一的聲明了！」「LI Edmond」就覺得論到偏頗，《明報》似乎已經追得上《蘋果日報》：「《明報》已經同《蘋果》不相伯仲，一樣咁××！」「華人」就覺得阿Ben應該追究《明報》：「香港的垃圾傳媒是要告的，如果不告，佢哋下次又來老屈，佢哋呢啲是慣性P×！」
不過，肯認衰喺反對派入面可能已經算好，「新民主同盟」立法會議員范國威照樣「抽水」，聲稱冇人斷章取義佢喎，仲話阿Ben搞到香港市民要「捱貴疫苗甚至冇得打」𠻹。
所以話，所謂「真理越辯越明」喎，咁都要對家fair先得嘅。 ■香港文匯報記者 何西