上次立法會九龍西補選，明明選咗做Plan B都仲要逼退人，嚟緊今次11月補選，直情玩都唔想畀佢玩，做到咁絕，以為實老死不相往來，但反對派超乎常人嘅社交倫理，總要再派多次花生。話說「自決派」嘅小麗老千（劉小麗）今個星期六又搞籌款活動，仲「邀請」屢被「屈基」嘅老馮（馮檢基）出席捧場𠻹。正所謂「沉默是我最後溫柔」，老馮唔出聲鬧小麗老千都算客氣，點知對方轉個頭向媒體報寸，行為之肉酸，連反對派陣營嘅黃大仙區議員譚香文都忍唔住話，「成班『自決派』當日Plan B搬龍門、輸打贏要，逼佢退選。還要就咁出一個WhatsApp短訊邀請佢出席自己的籌款晚宴，這未免欺人太甚了！」
WhatsApp邀赴宴被無視
做Plan B俾人屈到冇得做，喺民協又俾班後生仔眼超超，退埋黨仲要俾人監住發誓話唔再參選咁，老馮喺政圈嘅晚年生涯都幾坎坷，但對住班所謂同路人，就再坎坷都仲有。話說小麗老千諗住今個星期六搞籌款晚宴，發咗個WhatsApp畀老馮，「邀請」佢冇份選、有份捐咁話。正常人真係睬你都有味，老馮亦都冇覆佢，點知就俾小麗老千唱佢「已讀不回」喎。
同道人批「攞景兼贈慶」
譚香文就呢件事喺facebook出文，忍唔住問對方「究竟係邀請定攞景先？」佢就話，逼退人再邀請人哋嚟籌款，成件事認真「攞景兼贈慶」。若果真心邀請人出席修補關係的話，絕對唔係就咁發一個WhatsApp Message邀請人出席就算。
譚又分析，被小麗老千欽點做Plan B嘅工黨李卓人明明同老馮同期出道，但喺九西耕耘多年嘅老馮冇得選，明明係新界西嘅「老泛民」喺私相授受下就可以空降，「試問馮檢基又如何甘心？」
𠵱家小麗老千唔知會唔會再因反對派不和而令選情受損，譚香文亦話︰「家陣最需要非建制派團結一致的是你劉小麗，而不是馮檢基。」係咁意WhatsApp當邀請，仲要唱人唔肯覆，「想話暗示阿基小家？」
譚香文最後再補多刀︰「係（喺）從政之先，首先應該係處事做人，如果一個大學講師，連對待陣營內不同意見的自己人，都缺乏應有的尊重及禮數。那就難怪激進陣營今日何以四分五裂。」
唔少網民都覺得小麗老千真係好過分。「Kei Sun Tony Lam」話︰「肉酸到不得了。」
有網民就認為今次小麗老千放風都係想進一步逼退老馮，「Ivan C. Y. Lo」留言︰「想食人隻車也未免太露骨吧？」「Kee Cyk」就支持老馮︰「道不同，不相為謀。」
「華生」網民：無貢獻等人貢獻
有啲網民都費事理班反對派點樣狗咬狗，繼續揶揄佢哋嘅乞錢行為。「花生客」表示︰「唔覺得呢班人對香港對市民有咩貢獻，反而係市民對佢哋班人貢獻最多。」■香港文匯報記者 甘瑜