笑什麼？你都係一身蟻啦！「熱狗（熱血公民）」前頭目狗達（黃洋達）日前被人踢爆已經按咗層樓，「香港民族黨」召集人陳浩天竟然即刻抽水，問對方「啊，駛（使）唔駛（使）我畀財務意見？」狗達瞬間抵唔住頸，反問將要回覆保安局局長自己有咩申述嘅陳浩天︰「駛（使）唔駛（使）我畀法律意見？」「港獨」分子之間嘅互相恥笑，真係吓吓出血。
陳浩天日前喺facebook發咗句︰「啊，駛（使）唔駛（使）我畀財務意見？利申冇按樓經驗。」冇追開post嘅人可能唔知咩事，按樓其實係講緊狗達按樓，「啊」係狗達對事件被踢爆後嘅反應，「財務意見」當然係講緊狗達撈唔掂啦。短短兩句寸到咁應，「Siu Lee」都忍唔住話︰「太平洋比（俾）你抽乾了。」
狗達都抵唔住頸，引用返「民族黨」可能被禁止運作嘅新聞，反問陳浩天︰「駛（使）唔駛（使）我畀法律意見？」
網民「點睛」：五十步笑五十步
網民就「Alex Cheung」恥笑黃洋達沒有法律知識，「學人俾（畀）法律意見，顧掂自己先啦。」「Cheung Ka Chun 」就揶揄︰「啲『熱狗』五十步笑五十步咁風趣嘅？」「熱狗」「Chan Kim Man」就反擊道︰「係喎，邊好似你咁有得住『新移民』公屋姐（啫）！水泉澳喎。」
咁公道啲講，陳浩天明明無業，住公屋都可以係咁使錢仲請到律師，真係能人所不能㗎；狗達自己就坐過監嘅，要畀意見嘅話，好似都係陳浩天畀財務意見狗達恰當啲，分分鐘教識狗達無本生利，唔使再跪求訂購㗎。■香港文匯報記者 鄭治祖