■仇思達喺節目踢爆黃洋達按咗層樓。 fb短片截圖「熱狗（熱血公民）」前「首領」狗達早前一洗「萬人台」嘅氣魄，跪低死乞爛乞300個網台計劃訂購，令唔少人驚訝。仇口深上加深嘅「神駒」仇思達前晚就踢爆，話原來狗達3個月前已經連自己層樓都按埋，質疑所謂訂購網台計劃其實只係幫佢贖樓，恥笑一班「熱狗」根本就係俾人呃。狗達得知自己俾神駒踢爆後，弱弱地「啊」咗一聲，但佢facebook噚日就冇回應過件事，反而貼咗自己搭的士返屋企嘅嘢出嚟「炫富」。又真係幾值得「炫耀」嘅，𠵱家層樓按咗，搭的士真係好豪㗎啦。
4月按6月籌 時間夾好晒
係咪衰呢？本身喺網上口水戰下咪算囉，早前書展期間，狗達對喺檔口直播食熱狗嘅神駒郁手郁腳，神駒亦動真格咁去挖狗達嘅醜聞。
前晚，神駒就喺自己網台節目爆料，話自己去咗查冊，發現狗達個石硤尾單位，原來喺3個月前已經攞咗去銀行按，質疑佢4月底按樓，6月就話籌錢搞網台計劃，其實所籌嘅錢都只係為咗填氹，恥笑一班畀咗錢嘅人「你哋幫緊黃洋達贖樓咋」！
神駒再封埋狗達後路話，唔好攞籌款係擺入公司做擋箭牌，「你兩公婆唔×出糧嘅。」
神駒寸課金友幫狗填氹
神駒仲話，狗達等人之前仲話要永續基本法，嚇大家樓契喺2047年之後就會變廢紙，但佢自己就寧願按樓都唔賣，反映佢對香港樓市嘅前景其實非常樂觀，「咁講乜×嘢2047啊？講×完自己都唔×信啦。」
佢再連環算賬，話狗達之前質疑「青年新政」可以喺中銀開戶口就係鬼，點知自己按樓都係交通銀行做，「咁你又係咪鬼？」
除咗發現狗達按樓，神駒仲發現狗達層411呎嘅樓係喺2007年用「沙士價」加兩萬蚊買返嚟，即係間屋2003年85萬，到2007年狗達買入時，都係87萬咁多，「養老鼠都唔止啦！」佢叫狗達交代自己點解可以咁平買樓，再叫一班「益友」各出其謀咁查吓。
心虛「冷處理」 「啊」完當無事
俾人擺晒上枱咁樣衰，狗達有咩反應？神駒友好、近排都全力打狗嘅「JoJo Wu」就貼咗張截圖出嚟，內容係「熱狗」「Alan Fok」同狗達講「你仲要贖樓嘛」，狗達仲以為自己神不知鬼不覺，反問對方「贖咩樓」，然後對方就講咗神駒踢爆一事，狗達就覆返句︰「啊。」
「JoJo Wu」仲好抵死咁貼個查冊結果出嚟，揶揄道︰「秀姑（狗達老婆陳秀慧）嫁咗俾（畀）汪洋（狗達）咁耐，層樓都係無佢名，只係一個幫過汪洋嘅契弟。」「Sze Nga」就再刺激早前先大鬧鄭松泰老婆嘅秀姑咁話︰「鄭松泰層樓有無寫老婆名？」
「Sylvester Lam」食晒花生︰「查出黎（嚟）激死秀姑。」
「Jonathan Luk」就幫狗達整咗個口號︰「訂閱PassionPrime，贖返我層樓。」 ■香港文匯報記者 甘瑜
