■睇戇橋笑得幾戇。 fb圖片戇橋收嘢喇！收嘢喇！公民黨黨魁戇橋（楊岳橋）日前到美國史丹福大學出席座談會，以為外國人地方就係comfort zone？錯晒！一班居美港人就不滿佢同號稱「大狀黨」嘅公民黨，無對因為旺暴而入冊嘅前「本土民主前線」前發言人「獨琦」（梁天琦）施以援手，仲喺多個議題上「出賣香港人」，仲即場送咗「公民黨賣香港」橫額同「獎狀」畀佢。最頂癮嘅係佢收嘢嗰陣只係識傻笑，戇橋呢個名真係無改錯！
查實公民黨除咗投票之外，喺對「港獨」立場都識買幾邊嘗試做牆頭草㗎，主席梁家傑同現任立法會議員用「言論自由」等等幫口，但就絕口不提支持「港獨」，撐「港獨」就交返畀元老吳靄儀嚟做。
雖然係咁，「獨」派到𠵱家仲係啄住公民黨、特別係戇橋，皆因戇橋前年立法會新東補選贏咗「獨琦」，個個月袋九萬六，相反「獨琦」就淪為階下囚。
戇橋喺美國西岸時間前晚到史丹福出席座談會，就遇到一個叫做「舊金山香港社團聯會」嘅團體踩場。佢哋不滿戇橋同擁有大量法律資源嘅公民黨無幫過「獨琦」，而戇橋喺國歌法本地立法、「一地兩檢」等反對立場亦都唔夠硬淨，加上喺「香港民族黨」單嘢方面更加叫特區政府界定國家安全「紅線」，於是就送咗寫上「公民民主黨，攜手賣香港」嘅橫額、紅線同「獎狀」過佢嘞。
可能冇諗過去到美國都俾人鬧，戇橋收嘢嗰陣只係識傻笑，事後仲話欣賞人哋咁有心，整啲咁有創意嘅道具畀佢喎。相反，同佢一齊出席座談會嘅「民主派會議」召集人莫乃光就全身而退。
居美廢人鬥遊美傻人
睇返呢個「舊金山香港社團聯會」，個facebook專頁都係早兩日先開，睇落都係似為咗狙擊戇橋而搞嘅。網民「Eugene Lee」就不滿成班人隔住成個太平洋食香港花生，叫佢哋咁愛港就應該返嚟建設吓，「自己匿喺舊金山，但就好意思指責人唔賣力，真係多×餘。」 ■香港文匯報記者 陳庭佳