■民記籲市民踴躍反映電器回收實況。為咗應對電子廢物，特區政府近日落實咗「四電一腦」回收計劃，環境局局長黃錦星日前就話計劃運作良好，咁市民係咪咁睇呢？民建聯就發現，近日都仲係有市民喺街邊棄置洗衣機、冷氣機等，於是tag（標籤）咗黃錦星希望佢了解情況，仲呼籲市民如有發現都影低留言添。
為咗做好環保回收，政府喺今個月1號已落實「四電一腦」回收計劃，規定冷氣機、雪櫃、洗衣機、電視機、電腦、打印機、掃描器同顯示器呢啲電器，銷售喺賣貨時要提供埋免費除舊服務。
不過，似乎呢個模式仲係有唔少問題。民建聯近日就喺facebook度出post，貼咗兩張相出嚟，反映喺唔同地點都有市民棄置上述電器，「睇嚟有啲市民等唔切回收商喎，局長又知唔知呢？」
民建聯仲呼籲市民如有發現都影低留言，tag埋局長畀佢知道個計劃嘅運作情況添。
唔少市民都響應呼籲報料，貼出有人喺西環掉電視機、塘尾道有人掉雪櫃嘅相。「James Lo」坦言︰「最好既（嘅）制度都要有人配合先得。」
有唔少市民則就計劃畀意見，有人認為政府應該提供獎勵鼓勵市民咁做，有人就認為唔應該限定一個回收商做回收，否則好多市民都冇耐性等咁話。睇嚟政府真係要再諗諗計令到個計劃提升成效嘞。
克勤：需讓更多回收商加入
身為民建聯環境政策及衛生政策發言人嘅立法會議員陳克勤，就建議政府加快持牌回收商的審批，讓更多回收商加入市場，提升效率，盡量爭取提供即日除舊服務，減少不便。
佢又建議政府可在屋邨垃圾收集站、公眾垃圾收集站騰出空間，讓未能等待除舊服務的市民暫時存放舊電器，等待持牌回收商回收，同時要加強宣傳工作，特別係社區宣傳工作，令市民了解政策的具體執行細節，避免受不當銷售商誤導。 ■香港文匯報記者 甘瑜