選舉真係好複雜㗎，有時抹黑攻勢嚟自對手定自己人都好難分。近日，上水區出現多張「抹黑」參選北區區議會石湖墟選區嘅林卓廷（鴿廷）嘅banner（橫額），林卓廷班支持者即刻將矛頭指向建制派參選人，甚至「同路人」、另一個煽暴派候選人梁金成。
不過，有網民噚日就上載咗啲相，話自己親眼見到林卓廷助選團自己掛個抹黑banner喎。有網民狠批林卓廷方面低莊，但亦都有人質疑啲助選團阿姐係「諜中諜」。香港文匯報記者噚日就打畀林卓廷諗住求證，點知對方就拒絕回應，話︰「我唔得閒啊。」
網民「Jacky Man」噚日朝早喺facebook群組「North District 北區」度出post，話佢朝早出街，發現上水有好多張抹黑民主黨嘅banner，諗住上去睇清楚啲情況，點知喺順欣花園附近，見到兩個阿姐掛緊抹黑banner，正想上去鬧對方時，「發現果（嗰）兩個阿姐係幫林卓廷助選既（嘅）義工......我即場黑人問號，心諗......咁都得？林生竟然為左（咗）選票，自己搵人去掛banner抹黑自己？有冇人知究竟發生咩事？」
根據「Jacky Man」啲相，兩個阿姐企喺banner附近，同時佢哋睇住大堆林卓廷物資，其中一個阿姐一度對banner有所動作，有人就推斷係一個阿姐掛banner，另一個負責睇水咁話，仲爆料話睇水阿姐係林卓廷嘅資深義工李太咁話。
「Grace Law」質問林卓廷︰「自己抹黑自己？打悲情牌？算啦，全投金金（意指梁金成）。」「Fung Lee」揶揄林卓廷︰「『林已完』就真係算啦，除咗依（𠵱）呢幾個月有出現過之外，其他時間都淨係喺立法會見過佢。」
不過，有班人堅信林卓廷係俾人陷害，反話出post者係鬼，仲質疑點解出post者唔拍片。「Jacky Man」就話︰「你信咪信囉，我親眼見，有埋相都唔信，咁下次拍片囉，拍左（咗）片你都可能唔信，咁點算？係咪要你自己親眼見先信？但你呢D（啲）盲粉可能親眼見都唔會信，又會諗肯定有人陷害佢。」
諷助選阿姐「食幾家茶禮」
有人就懷疑係個阿姐嘅問題。「Ho Kwan Leung」話︰「你真係當阿姐冇糧出嫁（㗎）？食人幾家茶禮是常識吧。......阿姐會唔會係對家安排佢去人地（哋）到（度）做義工，再叫佢掛埋抹黑banner特登比（俾）人地（哋）發現呢？」
睇返林卓廷，佢噚日中午都有出post講「抹黑文宣」嘅事，但就冇提到自己助選團義工俾人質疑單嘢，只係一味話啲抹黑海報係要打擊佢選情咁話。
鴿廷話「唔得閒」cut線
香港文匯報記者都特登打咗畀林卓廷求證，點知對方一句「我唔得閒啊」就收咗線啦。
同區候選人仲有新民黨、公民力量嘅孔永業。 ■香港文匯報記者 甘瑜