■周偉雄接連被揭違例泊車。 fb圖片見識吓咩叫「面皮成呎厚」先：泛暴派區議員周偉雄前日喺葵青區議會嘅特別會度大講違泊問題，轉頭就被街坊影到佢架靚車喺會議期間違法泊喺興芳路。佢雖然畀人「人贓並獲」，但係都知衰，喺媒體訪問時解釋話因為自己已經開會遲到，唔想遲上加遲先至違泊，仲認錯話下次唔會𠻹。點知「說時遲」，佢噚日又再一次被人影到「並排停車」，真係信佢一成，雙目失明。知法犯法，更要罪加一等。
我話你違規就要追究到底，我自己犯法就情有可原，周偉雄自己違泊走去鬧人違泊，真係神演繹咗何謂「今天的我打倒昨天的我」，泛暴派與其只係識得「諉過他人」將違泊問題歸咎於抄牌執法，煽動人仇恨警察，不如叫自己友反省一吓先啦。
網民諷刺：改名周圍泊啦
唔少網民忍唔住要鬧爆周偉雄。好似「Wilson Kwan」就話：「呢啲咪叫做：講一套做一套，有口話人冇口話自己，揸住雞毛當令箭囉。」「Yiy Says」就認為佢身為議員要罪加一等：「知法犯法是賤畜行為！」「Bling Bling Kwan」更建議佢改名：「 不如改名叫『周圍迫（泊）』啦」。
有網民直言，泛暴派一向「本性難移」。「Tszeman Leung 」話：「目無法紀向來是泛民政棍的卑劣品性！」「wkkenneth」就覺得佢當選咗就係神仙，叫選民要帶眼識人：「選完咪為所欲為lo（囉），on×選民以為呢啲黃絲黑衣會幫佢地（哋）」。「Lam Lam」則笑話：「就係太多違泊搞到佢冇得違泊。」
正所謂「人無信不立」，「一哥」前日勸戒（誡）區議員「以身作則」真係講得啱。其實無論遲到或者違泊都係「錯」，泛暴派雙重標準，只會用錯嘅事去幫另一樣錯嘅事做解釋，係點講都唔會通。不如聽聽聖雄甘地講：「手段的不純潔，必然導致目的不純潔。」 ■香港文匯報記者 黃書蘭